ۇلتتىق ەكونوميكا ءمينيسترى الىبەك قۋانتىروۆ "ءتاريفتى ينۆەستيسيالارعا ايىرباستاۋ" باعدارلاماسىن ىسكە اسىرۋ اياسىندا كوممۋنالدىق قىزمەتتەردىڭ ءتاريفى ورتا ەسەپپەن قانشاعا وسەتىنىن ايتتى.
ونىڭ ايتۋىنشا، 2023 جىلدىڭ ەكىنشى توقسانىندا مينيسترلىك بيىل 1 شىلدەدەن باستاپ تاريفتەر مەن ينۆەستيسيالىق باعدارلامالاردى وزگەرتۋگە 212 ءوتىنىمدى قىسقا مەرزىمدە بەكىتكەن.
"ناتيجەسىندە تۇتىنۋشىلار مەن كاسىپورىندار مۇددەسىنىڭ تەڭگەرىمىن ەسكەرە وتىرىپ، كوممۋنالدىق قىزمەتتەر تاريفتەرىنىڭ وزگەرۋى قالىپتى بولىپ، ورتاشا ەسەپپەن 10-30% قۇرايدى. بۇل رەتتە حالىقتىڭ وسال توپتارى كوممۋنالدىق تولەمدەر ءۇشىن شىعىنداردىڭ ءبىر بولىگىنە وتەماقى بەرۋ ەسەبىنەن اكىمدىكتەردىڭ كوممۋنالدىق قىزمەتتەرگە اقى تولەۋ جونىندەگى كومەگىنە سەنە الادى"، - دەپ مالىمدەدى قۋانتىروۆ ۇكىمەت وتىرىسىندا.
ول جىلۋمەن جابدىقتاۋدا جەلىلەردىڭ توزۋ دەڭگەيى جوعارى قىزىل ايماقتاعى كاسىپورىندار ءۇشىن ينۆەستيسيا تارتۋ باسىم تارتىپپەن جۇزەگە اسىرىلاتىنىن اتاپ ءوتتى. جىلۋمەن جابدىقتاۋ سالاسىندا 27 كاسىپورىن بويىنشا توزۋ دەڭگەيى 65%-تەن اسادى، ونىڭ ىشىندە 24 كاسىپورىن ءۇشىن ينۆەستيسيالىق باعدارلامالار بەكىتىلدى. اتالعان سالاعا بيىل 112 ملرد تەڭگە ينۆەستيسيالاۋ جوسپاردا بار.
"بيىل جەلىلەردىڭ توزۋى 58%-تەن 55%-كە دەيىن تومەندەپ، 2024 جىلى قىزىل ايماقتان 6 كاسىپورىن شىعادى دەپ جوسپارلانىپ وتىر. ەكى بولمەلى پاتەر ءۇشىن جىلۋ بويىنشا ورتاشا ەسەپ 1 620 تەڭگەگە نەمەسە 20%-كە ارتادى"، - دەدى مينيستر.
ەلەكترمەن جابدىقتاۋ سالاسىندا 19 كاسىپورىننىڭ توزۋ دەڭگەيى 70%-تەن اسادى. سونىڭ ىشىندە 16 كاسىپورىن ءۇشىن ينۆەستيسيالىق باعدارلامالار بەكىتىلدى. اتالعان سالاعا وسى جىلى 92 ملرد تەڭگە ينۆەستيسيالاۋ جوسپاردا بار.
"بيىل جەلىلەردىڭ توزۋى 64%-تەن 62%-كە دەيىن تومەندەيدى دەپ كۇتىلۋدە. ورتاشا كۆيتانسيا 660 تەڭگەگە نەمەسە 20%-كە ۇلعايادى"، دەدى ۇلتتىق ەكونوميكا ءمينيسترى.
ال سۋمەن جابدىقتاۋ سالاسىندا 15 كاسىپورىننىڭ توزۋ دەڭگەيى 70%-تەن اسادى، ونىڭ ىشىندە ينۆەستيسيالىق باعدارلامالار 13 كاسىپورىن ءۇشىن بەكىتىلگەن. اتالعان سالاعا وسى جىلى 29،5 ملرد تەڭگە ينۆەستيسيالانادى.
ءمينيستردىڭ ايتۋىنشا، بيىل جەلىلەردىڭ توزۋى 63%-تەن 58%-كە دەيىن تومەندەپ، 2024 جىلى قىزىل ايماقتان 8 كاسىپورىن شىعادى دەپ جوسپارلانۋدا. ورتاشا كۆيتانسيا 200 تەڭگەگە نەمەسە 25%-كە وسەدى.
سۋ بۇرۋ سالاسىندا 26 كاسىپورىننىڭ توزۋ دەڭگەيى 70%-تەن اسادى، ونىڭ ىشىندە 23 كاسىپورىن ءۇشىن ينۆەستيسيالىق باعدارلامالار بەكىتىلدى. بۇل سالاعا 2023 جىلى 15،3 ملرد تەڭگە ينۆەستيسيالانادى.
ناتيجەسىندە جەلىلەردىڭ توزۋى 74%-تەن 71%-كە دەيىن تومەندەپ، 2024 جىلى قىزىل ايماقتان 3 كاسىپورىن شىعادى. ەكى بولمەلى پاتەر ءۇشىن ورتاشا ەسەپ 220 تەڭگەگە نەمەسە 30%-كە ۇلعايادى.
"وسىلايشا، بارلىق كوممۋنالدىق قىزمەت بويىنشا ورتاشا ەسەپتىڭ ۇلعايۋى شامامەن 3-4 مىڭ تەڭگەنى قۇرايدى"، - دەدى قۋانتىروۆ.
