تاۋەلسىز باقىلاۋشىلار ۇيىمىنىڭ ءتوراعاسى بەسجان تولەۋبەكۇلىنا تاعىلعان ايىپ بەلگىلى بولدى. الماتى قالاسىنىڭ پوليسيا دەپارتامەنتى ناۋرىزباي اۋداندىق پب مايورى جۇنىسبەكوۆ بەلسەندى بەسجان تولەۋبەكۇلىن ق ر اكىمشىلىك قۇقىق بۇزۋشىلىق تۋرالى كودەكستىڭ 488 بابى 7 ءبولىمى بويىنشا "بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى زاڭناماسىن بۇزدى، زاڭسىز ميتينگ ۇيىمداستىردى" دەپ ايىپتاپ، حاتتاما تولتىرعان.
بەلسەندىنى 11 شىلدە كۇنى اۋەجايدى باسىپ الۋ ءىسى قارالعان ناۋرىزباي اۋداندىق سوتى عيماراتى الدىندا "سانكسيالانباعان نارازىلىق اكسياسىنا قاتىسىپ، "حالىق تەرروريست ەمەس!" دەگەن پلاكات ۇستاعان توپ الدىندا ميكروفونمەن سويلەپ، الماتى تۇرعىندارىن بەينە ۇندەۋ ارقىلى زاڭسىز ميتينگكە شاقىردى. پروكۋراتۋرا مەن اكىمدىك وكىلدەرىنىڭ ەسكەرتۋىنە قۇلاق اسپاي ءوز ارەكەتىن جالعاستىردى. جيىنعا قاتىسىپ، بەلسەندى بولدى" – دەگەن ايىپ تاعىلعان. بۇل تۋرالى الەۋمەتتىك جەلىدە كۇلتەگىن اسپان ۇلى جازدى.
ءقازىر بەسجان تولەۋبەك ۇلى ناۋرىزباي اۋداندىق پوليسيا بولىمشەسىندە وتىر. بەلسەندىنىڭ جانىندا ادۆوكاتى جالعاس ساپارحانوۆا بار. ولار سوتتىڭ وفلاين ءوتۋىن تالاپ ەتىپ جاتىر.
ەسكە سالا كەتەيىك، بەلسەندىنى كەشە جامبىل وبلىستىق سوتىنداعى قاڭتارشىلاردىڭ اپەللياسيا پروسەسىنەن الماتىعا ورالا سالىسىمەن ۇيىنە كىرەبەرىستە پوليسەيلەر ۇستاپ اكەتكەن.
پىكىر قالدىرۋ