قاراعاندى وبلىسىندا بالالار جاپپاي ۋلانىپ، ءبىر بالا قايتىس بولدى. التى بالا جانساقتاۋ بولىمىندە جاتىر. بۇل تۋرالى ەلىمىزدىڭ باس سانيتار دارىگەرى ايجان ەسماعامبەتوۆا حابارلادى.
"12 بالا اۋرۋحاناعا تۇسكەن. ازىرگە ولاردىڭ نەدەن ۋلانعانى بەلگىسىز. وكىنىشكە وراي ءبىر بالا قايتىس بولدى. 6 بالا جانساقتاۋ بولىمىندە جاتىر. بەس بالانىڭ جاعدايى ورتاشا. بارلىعى ەر بالا. اۋرۋحاناعا العاشقى بالا 30 شىلدە كەشكە ءتۇستى" - دەدى ەسماعامبەتوۆا.
وقيعا قاراعاندى وبلىسىنىڭ بالالارعا ارناۋلى الەۋمەتتىك قىزمەت كورسەتۋ ورتالىعىندا بولعان.
قاراعاندى وبلىسى اكىمدىگىنىڭ حابارلاۋىنشا، وقيعانىڭ سەبەبىن انىقتاۋ ءۇشىن ارنايى كوميسسيا قۇرىلدى. وقيعاعا قاتىستى قىلمىستىق ءىس قوزعالىپ، قاراعاندى وبلىسىنىڭ ارنايى پروكۋرورلار باسقارماسىنا بەرىلدى.
باس پروكۋراتۋرانىڭ باسپا ءسوز قىزمەتى بالالاردىڭ تاماقتان ۋلانۋ فاكتىسى بويىنشا قاراعاندى وبلىسىنىڭ بالالارعا ارناۋلى الەۋمەتتىك قىزمەتتەر كورسەتۋ ورتالىعى كمم-عا قاتىستى قىلمىستىق كودەكستىڭ 304-بابىنىڭ 2-بولىگى (اۋىر زارداپتارعا اكەپ سوقتىرعان سانيتارلىق ەرەجەلەردى نەمەسە گيگيەنالىق نورماتيۆتەردى بۇزۋ) بويىنشا سوتقا دەيىنگى تەرگەۋ باستالعانىن حابارلادى.
پىكىر قالدىرۋ