دەنساۋلىق ساقتاۋ ۆيسە-ميريسترى – باس مەملەكەتتىك سانيتارلىق دارىگەر ايجان ەسماعامبەتوۆا الماتى اۋرۋحاناسىندا ۆيچ جۇقتىرۋ بويىنشا تەكسەرىستىڭ ناتيجەسىن جاريالادى، دەپ حابارلايدى Sputnik قازاقستان.
ماۋسىم ايىندا الماتىداعى ورتالىق كلينيكالىق اۋرۋحانادا ەمدەلگەن ءۇش ناۋقاس ۆيچ جۇقتىرىپ العان. باس سانيتاردىڭ ايتۋىنشا، ۇشەۋى دە جانساقتاۋ بولىمىندە جاتقان. ول جەردە تاعى ءبىر پاسيەنت بولعان.
"ءدال وسى پاسيەنت اۋرۋحاناعا باسقا اۋرۋمەن تۇسكەن. الدىمەن ينفەكسيالىق اۋرۋحانادا ەمدەلدى. ول جاقتا ۆيچ-كە تەست تاپسىرعاندا تەرىس ناتيجە شىققان. ال ورتالىق كلينيكالىق اۋرۋحاناعا تۇسكەننەن كەيىن تاعى ءبىر سىناما الىندى، سول كەزدە كۇدىك تۋعىزاتىن ناتيجە شىقتى. بۇل دەگەنىمىز، ۆيرۋس ينكۋباسيالىق كەزەڭنەن ءوتىپ جاتىر، ەكى اپتادان كەيىن تاعى سىناما الۋ كەرەك. سوندا ناقتى ناتيجە شىعادى. وكىنىشكە قاراي، ول ادام نەگىزگى اۋرۋىنان قايتىس بولدى. سوندىقتان قوسىمشا سىناما الىنباي قالدى”، - دەدى ەسماعامبەتوۆا ۇكىمەتتە وتكەن بريفينگتە.
تەكسەرىسكە سايكەس، قايتىس بولعان ناۋقاس پەن ءۆيچ-تى جۇقتىرعان ادامداردىڭ ۆيرۋسى بىردەي بولىپ شىقتى. كوميسسيا مۇشەلەرى جانساقتاۋ بولىمىندە ءينۆازيۆتى شارالار كەزىندە قاۋىپسىزدىك تالاپتارى ساقتالمادى دەگەن قورىتىندىعا كەلدى.
"ال جانساقتاۋ بولىمىندە سان الۋان ءينۆازيۆتى شارالار جاسالادى. ينەكسيا، سيستەما، كاتەتەر جانە تاعى باسقا. ۆيرۋس وسى جولدارمەن عانا تارايدى"، - دەپ اتاپ ءوتتى ەسماعامبەتوۆا.
كوميسسيا ناقتى قانداي شارا كەزىندە ءۇش ادامنىڭ ۆيچ جۇقتىرعانىن ايتا الماي وتىر. سەبەبى بەينەجازبا جوق.
ايتا كەتەرى، وسى وقيعادان كەيىن اۋرۋحانانىڭ باس دارىگەرى قىزمەتىنەن شەتتەتىلدى. ال ونىڭ ورىنباسارى مەن جانساقتاۋ ءبولىمىنىڭ قىزمەتكەرلەرى جۇمىستان بوساتىلدى. ولار ينفەكسيالىق قاۋىپسىزدىك بويىنشا قاجەتتى دايىندىقتان دا ۋاقىتىندا وتپەگەن. تەرگەۋ شارالارى جالعاسىپ جاتىر. الداعى ۋاقىتتا سوت ءوز شەشىمىن شىعارادى.
پىكىر قالدىرۋ