الماتى وبلىسىنداعى 11 مەكتەپتىڭ كۇردەلى جوندەۋىنە مونيتورينگ جۇرگىزىلدى. بۇل تۋرالى وقۋ-اعارتۋ مينيسترلىگىنىڭ باسپا ءسوز قىزمەتى حابارلادى. 

ورتا ءبىلىم بەرۋ كوميتەتىنىڭ حابارلاۋىنشا، جوندەلىپ جاتقان مەكتەپتەردىڭ كوبى 1970-1980 جىلداردىڭ باسىندا سالىنعان. ولاردىڭ قاتارىندا قونايەۆ قالاسىنىڭ ق.قايسەنوۆ اتىنداعى №4، ىلە اۋدانى ەكپەندى اۋىلىنىڭ №2 ورتا مەكتەپتەرى، ەڭبەكشىقازاق اۋدانى ەسىك قالاسىنىڭ ا. مالكەيەۆ اتىنداعى ءبىلىم-يننوۆاسيا ليسەيى، شەلەك اۋىلىنىڭ اباي اتىنداعى، ەسىك قالاسىنىڭ ابىلايحان اتىنداعى №4 ورتا مەكتەپتەرى، قاسكەلەن قالاسىنىڭ ق. ساتبايەۆ اتىنداعى مەكتەبى، كەگەن اۋدانىنىڭ جاڭابايەۆ اتىنداعى، تالعار اۋدانىنىڭ ك.نۇرپەيىسوۆ اتىنداعى، №10، № 12 ورتا مەكتەپتەرى بار. قازىرگى ۋاقىتتا بارلىق 11 ءبىلىم بەرۋ نىساندارىندا دەمونتاج جانە سەيسميكالىق كۇشەيتۋ جۇمىستارى ءجۇرىپ جاتىر.

"11 ءبىلىم بەرۋ وبەكتىسىندە كەشەندى جوندەۋ جانە مەكتەپ اۋماعىن اباتتاندىرۋ بويىنشا جۇمىستار جۇرگىزىلۋدە. ولاردىڭ باسىم بولىگىندە جوندەۋ جۇمىستارى ماۋسىم ايىندا باستالعان. شارتقا سايكەس اياقتالۋ مەرزىمى 6 ايدان 11 ايعا دەيىن سوزىلۋى مۇمكىن، ياعني وقۋ جىلىنىڭ باسىندا مەكتەپتەر بالالاردى قابىلداۋعا دايىن بولمايدى. ءبىز ءبىلىم باسقارماسىمەن بىرلەسىپ وقۋ-تاربيە پروسەسىن ۇيىمداستىرۋ ءۇشىن ءبىلىم الۋشىلاردىڭ ۋاقىتشا ورنالاسۋ ورىندارىن بەلگىلەدىك. ءوز كەزەگىندە مەردىگەر ۇيىمدار جوندەۋدى بەلگىلەنگەن مەرزىمنەن بۇرىن اياقتاۋعا دايىن"، – دەدى ورتا ءبىلىم كوميتەتى باسقارماسىنىڭ باسشىسى گۇلنار تالاسبايەۆا.

ورتا ءبىلىم كوميتەتىنىڭ ۇسىنىمدارى بويىنشا ءبىلىم باسقارماسى مەن مەكتەپتەر ءار مەكتەپ بويىنشا موديفيكاسيالاۋ جوسپارىن ازىرلەنگەە. ءبىلىم باسقارماسىنا جاقىن ورنالاسقان باسقا مەكتەپتەردىڭ جوبالىق قۋاتتىلىعىن ەسكەرە وتىرىپ، بارلىق وقۋشىلاردى وقىتۋمەن قامتاماسىز ەتۋ بويىنشا تاپسىرما بەرىلدى.