قونايەۆ قالاسىنداعى 4 ويىن مەكەمەسىنە جوسپاردان تىس تەكسەرىس جۇرگىزىلدى. بۇل تۋرالى تۋريزم يندۋسترياسى كوميتەتى حابارلادى.
تەكسەرۋ ناتيجەسىندە ءۇش بيزنەس سۋبەكتىسىنە قاتىستى اكىمشىلىك كودەكسىنىڭ 445ء-شى بابىنىڭ 3ء-شى تارماعى بويىنشا اكىمشىلىك ءىس قوزعالدى.
"ويىن اۆتوماتتارى زالىنىڭ يەلەرى ماشينالارعا تەحنولوگيالىق تۇردە سالىنعان ۇتىس پايىزى بويىنشا تالاپتاردى ساقتاماعان. "ويىن بيزنەسى تۋرالى" زاڭعا سايكەس، ول كەم دەگەندە 95% بولۋى كەرەك" – دەلىنگەن حابارلامادا.
قونايەۆ قالاسىنىڭ اكىمشىلىك مامانداندىرىلعان اۋدانارالىق سوتىنىڭ 2023 جىلعى 19 مامىرداعى شەشىمىمەن جانە الماتى وبلىستىق سوتىنىڭ 2023 جىلعى 20 شىلدەدەگى شەشىمىمەن ويىن بيزنەسىنىڭ 3 سۋبەكتىسى قۇقىق بۇزعانى ءۇشىن كىنالى دەپ تانىلدى.
ولاردىڭ ليسەنزياسى توقتاتىلىپ، ءارقايسىسىنا 300 اەك مولشەرىندە اكىمشىلىك ايىپپۇل سالىندى.
"7 اكىمشىلىك ءىس قوزعالدى، 6 ايىپپۇل سالىندى، ءبىر ويىن اۆتوماتتارى زالىنىڭ يەسى ليسەنزيادان ايىرىلدى. سونىمەن قاتار، زاڭدى بۇزعانى ءۇشىن جاۋاپكەرشىلىكتى كۇشەيتۋ ماقساتىندا مادەنيەت جانە سپورت مينيسترلىگىنىڭ تىكەلەي قاتىسۋىمەن ويىن بيزنەسى، لوتەرەيا جانە لوتەرەيا قىزمەتى سالاسىنداعى زاڭناماعا 62 تۇزەتۋدى كوزدەيتىن 3 زاڭ جوباسى ازىرلەندى" - دەيدى تۋريزم يندۋسترياسى كوميتەتىنىڭ ءتوراعاسى داستان رىسپەكوۆ.
پىكىر قالدىرۋ