اقتوبە قالاسىندا قۇرىلىس كومپانياسىنىڭ اقشاسىن ۇرلاعان بۋحگالتەر 7 جىلعا سوتتالدى.
47 جاستاعى ايەل قۇرىلىس فيرماسىندا جالعىز بۋحگالتەر بولعان. بارلىق قارجىلىق قۇجاتتارمەن جۇمىس ىستەگەن. ال ديرەكتور وعان ەلەكتروندى سيفرلىق قولتاڭباسىن بەرىپ قويعان. كومپانيا ەسەپشىسى سونى پايدالانىپ، جيەنى مەن تانىسىنىڭ جەكە كاسىپكەرلىك ەسەپشوتتارىنا ميلليونداعان قارجىنى اۋدارىپ وتىرعان. ال جيەنى ونىڭ ارەكەتىنەن حابارسىز بولعان.
ەسەپشوتقا تۇسكەن قاراجات اتقارىلعان جۇمىستىڭ اقشاسى دەپ ويلاعان.
وسىلايشا باس بۋحگالتەر 2018-2019 جىلدارى ارالىعىندا 42 ميلليون تەڭگە جىمقىرعان. جاساعان قىلمىسىنىڭ ءىزىن جاسىرۋ ءۇشىن جالعان شوت-فاكتۋرالار جاساعان. ديرەكتور كۇدىكتى ترانزاكسيالاردى بايقاپ قالىپ، بىردەن اۋديتورلىق تەكسەرىستى شاقىرعان. ناتيجەسىندە ەسەپشىنىڭ قىلمىسى اشكەرە بولعان.
سوتتا 47 جاستاعى ەسەپشى ءوز كىناسىن مويىندادى. ۇكىم شىققانعا دەيىن ول ديرەكتورعا 19 ميلليون تەڭگەسىن دە قايتارعان. ءبىراق 23 ميلليون 132 مىڭ تەڭگەنىڭ قارىزى قالدى.
سوتتىڭ شەشىمىمەن بۇرىنعى باس بۋحگالتەر 7 جىلعا باس بوستاندىعىنان ايىرىلدى. سونداي-اق ول سوت ۇكىمى زاڭدى كۇشىنە ەنگەننەن كەيىن 10 كۇننىڭ ىشىندە جابىرلەنۋشىگە شىعىندى تولىعىمەن وتەپ بەرۋگە مىندەتتەلدى.
پىكىر قالدىرۋ