شىمكەنتتە جوعالعان 18 جاستاعى بويجەتكەننىڭ دەنەسى ءوزى تۇرىپ جاتقان ءۇيدىڭ جەرتولەسىنەن تابىلدى. ونى ءولتىردى دەگەن كۇدىككە ستۋدەنت قىزدىڭ تۋعان جەزدەسى ءىلىنىپ وتىر، دەپ حابارلايدى "كتك" ارناسى.
"ق ر قك 99-بابى، «كىسى ءولتىرۋ» بابىمەن تىركەلىپ، بارلىق ساراپتاما تاعايىندالدى. تەرگەۋ جۇرگىزىلىپ جاتىر. كۇدىكتى يزولياتورعا قامالدى" ، - دەيدى شىمكەنت پد تەرگەۋ باسقارماسى باستىعىنىڭ مىندەتىن اتقارۋشى باتىربەك مىرزاگەلدييەۆ.
تۇركىستاننان شىمكەنتكە كەلىپ وقىپ جاتقان ايدا ءابىلدا تۋعان اپكەسىنىڭ ۇيىندە تۇرىپتى. 4 تامىزدا ۇيىنەن شىعىپ قايتا ورالماعان سوڭ، ەرتەسىنە ىزدەۋ جاريالانعان. ءۇش كۇننەن كەيىن تۋىستارى ونىڭ ءمايىتىن ءوزى تۇرىپ جاتقان ءۇيدىڭ جەرتولەسىنەن تاپقان. پوليسيانىڭ مالىمەتىنشە، دەنەسىندە زورلىق بەلگىلەرى بار مۇردەنى توسەك جايماسىنا وراپ تاستاعان. 18 جاستاعى بالدىزىن ازاپتاپ ءولتىردى دەگەن كۇدىككە ىلىنگەن 20 جاستاعى جەزدەسى تۋرالى كورشىلەرى جاقسى پىكىردە.
"مەن ازاماتتى بالا كۇنىنەن بىلەمىن. ول ادام ولتىرمەك تۇگىلى، مىسىققا زيانى جوق ادام. بىلتىر عانا ۇيلەنگەن، تورتبەس ايلىق بالاسى بار، ۇنەمى جۇمىستا بولاتىن. ونىڭ ومىرتقاسى اۋىراتىن، ياعني اۋىر كوتەرمەيتىن. ول قالايشا ادام ولتىرەدى؟ ال بالدىزى بىلتىردان بەرى ۇيىندە ءجۇردى. ءبىر ۇرىسقانىن ەستىمەگەنبىز. ءبىز ازاماتتىڭ ازعىندىققا باردى دەگەنىنە سەنبەيمىز" ، - دەيدى كۇدىكتىنىڭ كورشىسى ناتاليا ياپايەۆا.
پىكىر قالدىرۋ