وڭتۇستىك كورەيادا دەپورتاسيالانعان 2 قازاقستاندىققا قاتىستى سوت ۇكىمى شىقتى. سوت ولارعا ايىپپۇل سالىپ، ەلگە قايتاراتىن بولدى. بۇل تۋرالى 2 قازاقستاندىقتىڭ ادۆوكاتى مەيىرمان شەكەيەۆ ايتتى. 

"ەكەۋىدە كورەيادا ايىپپۇل تولەپ، وتانعا قايتادى. ولار ءۇش جىلدىق جازادان قۇتىلدى. كىم سوڭىنا دەيىن سىيىندى، بارلىعىنا راقمەت. قازاقستاننىڭ سىرتقى ىستەر مينيسترلىگىنە، سونداي-اق كورەياداعى كونسۋلدارعا ەرەكشە العىس ايتامىز"، - دەدى ادۆوكات مەيىرمان شەكەيەۆ.

ايتا كەتەيىك، 25 ناۋرىزدا 2002 جانە 2005 جىلعى ەكى قازاقستاندىق كورەعا بارعان. الايدا قۇجاتتاردىڭ دۇرىس بولماۋىنا بايلانىستى كەدەندىك باقىلاۋ قىزمەتكەرى ولاردى ەلگە كىرگىزبەي، دەپورتاسيالاۋ ءۇشىن كۇتۋ زالىنا جىبەرگەن. ەر ادامدار رەيستى كۇتىپ وتىرىپ، اۋەجايداعى ۇشۋ-قونۋ الاڭىنىڭ ماڭىنداعى ءۇش مەترلىك قورشاۋدان ءوتىپ كەتكەن.

كەيىن قازاقستاندىقتاردىڭ ءبىرى تەدجون قالاسىندا دۇكەندە تەلەفونىن قۋاتتاۋ كەزىندە ۇستالعان. ەكىنشىسى ۇستاپ بەرگەن ادامدارعا 30 ميلليون ۆون (10 ميلليون تەڭگەدەن اسا) سىياقى تاعايىندالعان ەدى.

كەيىنىرەك قاشقىن جىگىت سەۋلدىڭ كوشى-قون قىزمەتىنە ءوزى كەلدى. ول 15 جىلعا دەيىن باس بوستاندىعىنان ايىرىلۋى مۇمكىن ەدى، الايدا ونىڭ ءوزى كەلۋى جازاسىن جەڭىلدەتكەن.

ەكەۋى دە كىناسىن مويىنداپ، تابىس تابۋعا كەلگەندەرىن ايتقان. وڭتۇستىك كورەيا پوليسياسى ولارعا زاڭسىز شەكارادان ءوتۋ جانە قاشۋ ايىپتارىن تاققان.