استانادا بالالارىمەن بىرگە كوپقاباتتى ءۇيدىڭ تەرەزەسىنەن سەكىرىپ كەتپەك بولعان ايەل قۇتقارىلعان.

ءىىم مالىمەتىنشە، 9-شى قاباتتاعى پاتەردىڭ تەرەزەسىنەن ايەلدىڭ ەكى بالاسىمەن بىرگە سەكىرەيىن دەپ جاتقانىن ەستىگەن اۆتوپاترۋل وقيعا ورنىنا جەتكەن.

"ءبىرىنشى بولىپ №26 ۋچاسكەلىك پوليسيا پۋنكتىنىڭ پوليسيا بولىمشەسىنىڭ اعا ينسپەكتورى اسقار پاپىشيەۆ ءوزىنىڭ سەرىكتەسى ەلدوس نۇعمانوۆپەن بىرگە جەتتى. ولار اۋدان تۇرعىندارىمەن جيىن وتكىزىپ جاتقان بولاتىن. 9-شى قاباتقا كوتەرىلگەن پوليسەيلەر ۇلكەن بالانىڭ اكەسىمەن بىرگە تۇرعانىن كوردى" – دەلىنگەن پوليسيا حابارلاماسىندا.

ال كىشى بالاسىن ايەل ءوزى ۇستاپ تۇرىپ، وعان بىرەۋ جاقىنداسا، سەكىرەتىنىن ايتىپ ايقايلاعان. ءتارتىپ ساقشىلارىنىڭ ءبىرى ايەلدى سوزگە تارتىپ، مۇنداي قادامعا بارماۋىن ءوتىنىپ جاتقاندا، ەكىنشى پوليسەي فورماسىن ازاماتتىق كيىمگە اۋىستىرىپ ۇلگەرگەن. كەيىن ول پاتەرگە كىرىپ، ايەلگە بىلدىرتپەستەن ءبىر قولىمەن بالانىڭ قولىنان، ەكىنشى قولىمەن اناسىن مىقتاپ ۇستاپ الىپ، بولمەگە قاراي تارتىپ كىرگىزدى.

24 جاستاعى ايەلدىڭ وتباسىلىق جانجالدان كەيىن وسىنداي ارەكەتكە بەل بۋعانى بەلگىلى بولدى. ونىڭ كۇيەۋىنە قاتىستى اكىمشىلىك قۇقىق بۇزۋشىلىق تۋرالى كودەكستىڭ 73-بابىنىڭ 1-بولىگى "وتباسىلىق-تۇرمىستىق قاتىناستار سالاسىنداعى قۇقىققا قايشى ارەكەتتەر" بويىنشا اكىمشىلىك حاتتاما تولتىرىلدى.وتباسى ەرەكشە باقىلاۋعا الىندى. ايەل بالالارىمەن بىرگە استانا قالاسىنىڭ داعدارىس ورتالىعىنا ورنالاستىرىلدى. ونىمەن پروفيلاكتيكالىق اڭگىمە جۇرگىزىلىپ، پسيحولوگيالىق كومەك كورسەتىلدى.