قىرعىزستان قازاقستانعا باراتىن ەگىس سۋىن توقتاتتى. قىرعىزستان اۋىل شارۋاشىلىعى مينيسترلىگىنىڭ ايتۋىنا قاراعاندا، بۇل شەشىمگە ەكى تاراپتىڭ كەلىسىمىمەن كەلگەن.

17-19 شىلدەدە بىشكەكتە قازاقستان مەن قىرعىزستان وكىلدەرى كەزدەسىپ، كەزدەسۋ كەزىندە قازاقستان كيروۆ سۋ قويماسىنان جامبىل وبلىسىنداعى سۋارمالى ەگىسكە سۋدى كوبىرەك جىبەرۋدى سۇراعان. الايدا ەندى ەكى تاراپ تا كەلىسىمدى بۇزۋدى ءجون كورىپ وتىر.

"ولار 18-31 شىلدە ارالىعىندا كيروۆ قويماسىنان سەكۋندىنا بۇرىنعىداي 40 تەكشە مەتر ەمەس، 45 تەكشە مەتر سۋ جىبەرۋدى سۇرادى. ءبىز كوبەيتە المايتىنىمىزدى، ءوز ەگىسىمىزگە دە جەتپەي جاتقانىن العا تارتتىق. ەگەر 45 تەكشە مەتر سۋ الاتىن بولسا قازاقستاننىڭ 3،54 ميلليون تەكشە مەتر ءليميتى 4 تامىزدا-اق تاۋسىلادى. قازاقتار سوندا دا وتىنىشىنەن باس تارتپادى. سوندىقتان ەكى جاق قازاقستانعا ەگىس سۋىن تامىزدان باستاپ توقتاتۋ جونىندە حاتتاماعا قول قويدى"، - دەيدى قىرعىزستان اۋىل شارۋاشىلىعى مينيسترلىگى.

ۆەدومستۆونىڭ جازۋىنشا، ءقازىر قىرعىزستاننىڭ تالاس وبلىسىندا سۋ تاپشىلىعى بولىپ جاتىر، بۇل وبلىسقا كيروۆ سۋ قويماسىنان سەكۋندىنا 1،3 تەكشە مەتر جىبەرىلەدى. بىلتىر بۇل ۋاقىتتا سەكۋندىنا 13،7 تەكشە مەتر سۋ اعىتىلعان. بۇل تۋرالى ازاتتىق راديوسى حابارلادى. 

بۇعان دەيىن قازاقستاننىڭ ەكولوگيا جانە تابيعي رەسۋرستار مينيسترلىگى قىرعىزستان تامىزدان باستاپ جامبىل وبلىسىنا باراتىن ەگىس سۋىن توقتاتقانىن، سونىڭ سالدارىنان بۇل وڭىردەگى اۋىل شارۋاشىلىعى داقىلدارىنا ءقاۋىپ تونگەنىن حابارلاعان. بۇل اقپاراتقا قاراعاندا، 9 تامىزدا كيروۆ سۋ قويماسىنان تالاس وزەنىنىڭ باسسەينىنە 32،48 ميلليون تەكشە مەتر سۋ جىبەرىلگەن، ونىسى بىلتىرعىدان (177،28 تەكشە مەتر) 144،8 ميلليون تەكشە مەتر از.