رەسەي تەرگەۋ كوميتەتى "ۆاگنەر" جەتەكشىسى ەۆگەنيي پريگوجيننىڭ قازاسىن راستادى. تۆەر وبلىسىندا ۇشاق اپاتىنان قازا بولعان 10 ادامنىڭ ءبارىنىڭ ءاتى-جونى انىقتالعان.
بۇعان دەيىن "ۆاگنەر" اسكەري جاساعىنىڭ نەگىزىن قالاۋشى پريگوجيننىڭ قازا تاپقانى تۋرالى اقپارات جاريالانعان بولاتىن. ۇشاقتا "ۆاگنەر" كومانديرلەرىنىڭ ءبىرى دميتريي ۋتكين دە بولعان.
تەرگەۋ ورگاندارى ازىرگە ۇشاق اپاتىنىڭ سەبەبىن ايتپادى. تەلەگرام ارنالار مەن اقپارات قۇرالدارىندا اپات سەبەبى توڭىرەگىندە ءتۇرلى بولجام ايتىلىپ جاتىر. كەيبىرى بورتتا جارىلىس بولعانىن نەمەسە ۇشاقتى اۋە قورعانىسى اتىپ ءتۇسىرۋى مۇمكىن ەكەنىن ايتتى.
پريگوجين پايدالانىپ جۇرگەن Embraer جەكە ۇشاعى ماسكەۋدەن سانكت-پەتەربۋرگكە ۇشىپ، 23 تامىزدا اپاتقا ۇشىراعان. قۇتقارۋشىلار اپات ورنىنان 10 ءمايىت تاپقان.
پىكىر قالدىرۋ