قاماۋدا وتىرعان جۋرناليست دۋمان مۇحاممەدكارىم اشتىق جاريالادى. ول بۇل جولى ءوزىن دارىگەرلەرگە قاراتۋدى تالاپ ەتىپ وتىر. 

"دۋماننىڭ دەنساۋلىعى بويىنشا اۋرۋحاناعا اپارسىن دەپ بىرنەشە حات جازدىق. كەيىن دۋمانعا دارىگەرلەر كەلگەن، ولار "سەنى اۋرۋحاناعا جاتقىزامىز" دەپ ايتقان. 2-3 كۇن ءوتتى، ەشكىم كەلمەگەن. دارىگەرلەر ەمدەتەمىز دەپ، ءوز سوزدەرىندە تۇرمادى. دۋماننىڭ اشتىق جاريالاۋ سەبەبى وسىدان. ول دارىگەرلەر كەلسە، اشتىقتى توقتاتامىن دەپ ايتتى"– دەدى ءجۋرناليستتىڭ ادۆوكاتى عالىم نۇرپەيىسوۆ.

ادۆوكاتتىڭ ايتۋىنشا، ءجۋرناليستىڭ بۇيرەگى مەن اسقازانى سىر بەرە باستاعان. نۇرپەيىسوۆ جۋرناليسكە مەديسينالىق كومەك كەرەك ەكەنىن جەتكىزدى. ول دۋمان مۇحاممەدكارىممەن 31 تامىز كۇنى كەزدەسكەن. بۇل تۋرالى ازاتتىق راديوسى جازدى. 

"بۇگىن اكەسىمەن بىرگە دۋمانعا كىردىك. تەرگەۋشى جاۋاپ الايىن دەپ، تەرگەۋ جۇرگىزۋگە تىرىسقان. دۋماننىڭ الماتىعا اۋىستىرۋ تۋرالى تالابى ورىندالمادى، سوندىقتان ول بۇدان باس تارتاتىنىن ايتتى"– دەپ حابارلادى ادۆوكات.

ەسكە سالا كەتەيىك، دۋمان مۇحاممەدكارىم بۇعان دەيىن دە اشتىق جاريالاپ، دەنساۋلىعىنا قاتىستى اشتىعىن توقتاتقان بولاتىن. ادۆوكات ول كەزدە ونىڭ كوپ سالماق جوعالتقانىن حابارلاعان ەدى.