الەۋمەتتىك جەلىدە قاڭتار وقيعاسىندا قازا تاپقان 4 جاسار ايكوركەمنىڭ اكەسى ايدوس مەلدەحاننىڭ وتكەن ومىرىنە قاتىستى ءتۇرلى اقپارات تارالىپ جاتىر. بۇگىن ادۆوكات ءلاززات احاتوۆا ءوزىنىڭ facebook پاراقشاسىندا ايدوس مەلدەحانعا قاتىستى "قىزىنىڭ ءولىمىن ساۋداعا سالدى"، "2006 جىلى اۋىر قىلمىس جاساپ 10 جىل تۇرمەدە وتىرعان" دەگەن مالىمەتتەر جاريالادى. 

"4 جاسار قىزىنىڭ ءولىمىن ساۋداعا سالىپ جۇرگەن ايدوس مەلدەحاننىڭ ءوزى 2006 جىلى اۋىر قىلمىس جاساپ، بىرەۋدىڭ ورىمدەي قىزىنا زورلىق جاساماق بولىپ، ول كونبەگەن سوڭ، قيناپ ولتىرگەنىن، سول ءۇشىن ۇزاق مەرزىمگە سوتتالعانىن بىرەۋ بىلسە، بىرەۋ بىلمەيدى. ال 10 جىلدان اسا تۇرمەدە وتىرعان ايدوس مەلدەحان كىشكەنتاي قىزىنىڭ ءولىمى ءۇشىن ءار ءتۇرلى ۇيىمداردان قانشا قاراجات الىپ، قانشا پايدا كورگەنى دە كوپشىلىككە بەيمالىم" دەپ جازدى ادۆوكات.

وسىعان بالانىستى Qamshy.kz اقپارات اگەنتتىگى ايدوس مەلدەحانعا حابارلاسىپ، پىكىرىن بىلگەن بولاتىن. 

"ءقازىر بيلىك ادامدارى ءتۇرلى اقپارات تاراتىپ، قازاق حالقىن ادەيى ماعان قارسى قويىپ جاتىر. مەن – شىندىق ىزدەپ جۇرگەن اداممىن. بيلىكتەن قىزىمنىڭ ولىمىنە كىنالىلەردىڭ جاۋاپكەرشىلىككە تارتىلعانىن عانا تالاپ ەتەمىن.  ال بۇرىنعى ءومىرىمنىڭ قاڭتار وقيعاسىنا ەشقانداي قاتىسى جوق. قاڭتاردا قايتىس بولعان قىزدىڭ اكەسى رەتىندە قىزىمنىڭ قۇقىعى ءۇشىن كۇرەسەم"– دەدى ايدوس مەلدەحان.

ول ءوزىن "قىزىنىڭ ءولىمىن ساۋداعا اينالدىرىپ، بيلىكتەن 100 ملن سۇرادى" دەگەن ايىپتاۋلارعا دا جاۋاپ بەردى.

"بيلىكتەن اقشا دامەتىپ جۇرگەن جوقپىن. بۇنىڭ بارلىعى – جالعان اقپارات. بىزگە پاتەر بەرىلگەنى راس. ءبىراق وسىعان دەيىن سول پاتەردىڭ زاڭدى تۇردە ماعان جازىلماعانىن دالەلدەپ بەردىم. كەرەك بولسا، بەرگەن پاتەرلەرىن الىپ كەتسىن. ءقازىر ايكوركەمنىڭ ءىسى بويىنشا جۇمان ارمان يگىلىك ۇلى دەگەن جىگىتتى جاۋاپكەرشىلىككە تارتىلىپ جاتىر. ول – جوعارىدان تۇسكەن بۇيرىقتى ورىنداۋشى عانا. ودان جوعارى كومانديرلەرى بار. كەمىندە بولىمشە كومانديرى جاۋاپكەرشىلىككە تارتىلۋ كەرەك ەدى.  ال قارۋ قولدانعان ادامدار كۋاگەر رەتىندە قارالىپ جاتىر. وق اتقان ادام ەشقانداي جاعدايدا كۋاگەر بولا المايدى. مەنىڭ بار تالابىم – سول كىنالىلەردىڭ جاساعان قىلمىسى ءۇشىن جاۋاپكەرشىلىككە تارتىلۋى. بيلىكتەن باسقا ەشتەڭە سۇرامايمىن. بۇلار بولسا، حالىقتى ماعان قارسى قويۋدىڭ امالىن جاساپ جاتىر" – دەپ ايتتى ايكوركەمنىڭ اكەسى.

سونىمەن قاتار، ايدوس مەلدەحان ايكوركەممەن ءبىر كولىكتە بولىپ، بىرنەشە جەردەن جاراقات العان ەكىنشى قىزى جانەلدىڭ جاعدايىن دا مالىمدەدى. 

"17 جاستاعى قىزىم جانەلدىڭ دەنەسىندە وق قالدىقتارى ءالى بار. جۇرەگىنەن 2 مم جەردە دە وق قالدىعى تۇر. سول وقتاردى الدىرتۋدىڭ امالىن جاساۋىم كەرەك. ءوزىمنىڭ دە دەنساۋلىعىم ءماز ەمەس. دارىگەرلەر "ءبىر بۇيرەكتى الىپ تاستاۋ كەرەك" دەپ جاتىر. ونىڭ ۇستىنە اعزامداعى قانت مولشەرى دە كوتەرىلىپ كەتكەن. بۇگىن بار، ەرتەڭ جوق اداممىن. ءتىرى كەزىمدە جانەلدىڭ دەنساۋلىعى مەن بالالارىمىنىڭ قۇقىعى ءۇشىن كۇرەسىپ كەتۋىم كەرەك. شىندىقتىڭ اتى – شىندىق. ەگەر كۇرەس جولىنا تۇسكەنىم ءۇشىن بالالارىما قاتەر تونەتىن بولسا، سىرت مەملەكەتتەردەن، حالىقارالىق ادام قۇقىعىن قورعايتىن ۇيىمداردان كومەك سۇرايتىن بولام"– دەيدى ايدوس مەلدەحان.