قارجىلىق مونيتورينگ اگەنتتىگىنىڭ باسپا ءسوز قىزمەتى قايرات بورانبايەۆقا قاتىستى قىلمىستىق جولمەن الىنعان مۇلىكتى زاڭداستىرۋعا بايلانىستى سوتالدى تەرگەۋ جالعاسىپ جاتقانىن حابارلادى. 

تەرگەۋ شەڭبەرىندە جالپى قۇنى 90 ميلليارد تەڭگەدەن اساتىن اكتيۆتەردى، ونىڭ ىشىندە: مۇناي كەن ورنىن، گاز تاراتۋ كومپانياسىن، سەرۆيس سالاسىنداعى كاسىپورىندى، قوناق ءۇي جانە ساۋدا-ويىن-ساۋىق كەشەندەرىن، فيتنەس ورتالىقتار جەلىسىن، كەڭسە ءۇي-جايلارىن جانە باسقا دا اكتيۆتەردى مەملەكەت مەنشىگىنە ەرىكتى تۇردە قايتارۋ جونىندە شارالار قابىلدانعان.

سونداي-اق، قايرات بورانبايەۆ ءبىلىم بەرۋ ينفراقۇرىلىمىن قولداۋ قورىنا 30 ميلليارد تەڭگە اۋداردى. وسى وبەكتىلەردىڭ بارلىعى مەملەكەتتىك ورگاندار مەن كومپانيالاردىڭ بالانسىنا بەرىلەتىنى حابارلاندى، ال اقشالاي قاراجات ءبىلىم بەرۋ ينفراقۇرىلىمىن دامىتۋ ءۇشىن پايدالانىلادى.

ايتا كەتەيىك، بۇعان دەيىن قايرات بورانبايەۆ تابيعي گاز يمپورتى كەزىندە قاراجاتتى جىمقىرۋ بويىنشا 14،5 ميلليارد تەڭگە كولەمىندە ماتەريالدىق شىعىندى وتەگەن بولاتىن.

ەسكە سالايىق، بۇعان دەيىن پروكۋرور قايرات بورانبايەۆتى 8 جىلعا باس بوستاندىعىنان ايىرۋدى سۇراعان بولاتىن. كەيىنىرەك قايرات بورانبايەۆ قانشا جىلعا سوتتالعانى بەلگىلى بولدى.

سونىمەن قاتار، سوتتا بورانبايەۆتىڭ قانداي مۇلكى تاركىلەنەتىنى ايتىلعان ەدى.