1937 جىلدىڭ 27 قىركۇيەگىندە قازاقتىڭ ۇلى تۇلعاسى، الاش ارىسى ءاليحان بوكەيحانوۆ جالعان ايىپپەن ماسكەۋدە ءولىم جازاسىنا كەسىلگەن. 

ۇكىم سول كۇنى-اق ورىندالدى.

XX عاسىردىڭ باسىندا ۇلت تاۋەلسىزدىگى ءۇشىن كۇرەسكەن ءاليحان بوكەيحانوۆ 1866 جىلى 5 ناۋرىزدا قازىرگى قاراعاندى وبلىسى اقتوعاي اۋدانىندا دۇنيەگە كەلگەن.

مولدادان ءالىپبي ۇيرەنىپ، كەيىن 3 جىلدىق مەكتەپتە وقىعان ول كەيىن ومبى تەحنيكالىق ۋچيليششەسىن، پەتەربور ۋنيۆەرسيتەتىنىڭ زاڭ فاكۋلتەتىن ءتامامداعان. 

ءاليحان بوكەيحان ۇلى باستاعان الاشتىڭ اسقاق ارمانى – قازاق مەملەكەتىن قۇرۋ ەدى. 1917 جىلى شىلدەدە ورىنبوردا ءبىرىنشى جالپىقازاق سەزىندە الاش ۇلتتىق ساياسي پارتياسى زاڭداستىرىلىپ، الاش ۇكىمەتىن قۇرۋعا قادام جاسالدى.

ال سوۆەت ۇكىمەتى ورناعاننان كەيىن ءاليحان بوكەيحانوۆ قۋعىننان كوز اشپادى. وعان ۇلتشىل دەگەن ايىپ تاعىلىپ، ماسكەۋگە جەر اۋدارىلدى. سوندا دا قازاق مەملەكەتىنىڭ تۇتاستىعى جولىندا كۇرەسىن توقتاتپاي، ماقالالار، باياندامالار جازعان ءاليحان بوكەيحانوۆ اقىرى 1937 جىلى اتۋ جازاسىنا كەسىلدى. 

قۋعىن-سۇرگىن جىلدارى قازاقتىڭ 25 مىڭعا تارتا ماڭدايالدى ازاماتى اتىلدى.

ءاليحان بوكەيحانوۆ ءيىسى قازاقتىڭ ساناسىندا ماڭگى جاڭعىرادى، ساقتالادى!