مالىمەتتەرگە قاراعاندا، كاريموۆا 2001 جىلدان باستاپ 2013 جىلعا دەيىن «وفيس» دەپ اتالاتىن قىلمىستىق ۇيىمعا جەتەكشىلىك ەتكەن، ونىڭ قۇرامىنا بىرنەشە ونداعان ادام كىرگەن. ۇيىم قورقىتۋ-ۇركىتۋ، زورلىق جاساۋ ارقىلى قىلمىستىق قىزمەت اتقارعان.

گۇلنارا كاريموۆاعا «وفيس» دەپ اتالاتىن قىلمىستىق ۇيىمنىڭ باس ديرەكتورى بولدى دەپ ايىپتاپ وتىر. ول وسى ۇيىمدى قۇرۋعا جانە قىلمىستىق قىزمەتىن باستاۋعا قاتىسقان، شۆەيساريادا وفيس كومپانياسى مەن ونىڭ مۇشەلەرى اتىنان بانك ەسەپتەرىن اشقان، قىلمىستىق جولمەن تۇسكەن اكتيۆتەردى سوندا اۋدارىپ وتىرعان، قارجى وپەراسيالارىن نەگىزدەۋ ءۇشىن جالعان قۇجات دايىنداعان.

ايىپتاۋ قورىتىندىسىندا وزبەكستاننىڭ تەلەكوممۋنيكاسيا سالاسىندا جۇمىس ىستەگىسى كەلەتىن شەتەل كومپانيالارى كاريموۆاعا پارا تولەۋى ءتيىس بولعانى، گۇلنارا «وزبەك پرەزيدەنتىنىڭ قىزى جانە وزبەك شەنەۋنىگى مارتەبەسىن پايدالانعانى»، سول ارقىلى شەكسىز ىقپالعا يە بولعانى دا ايتىلعان.

تەرگەۋ اياسىندا 340 ميلليوننان استام شۆەيسار فرانكى ($370،25 ملن) وزبەكستانعا قايتارۋ ماقساتىندا تاركىلەنگەن. بۇعاتتا ءالى 440 ميلليون فرانك جاتىر.

شۆەيساريا فەدەرالدىق پروكۋراتۋرا تەرگەۋى 2012 جىلى باستالدى. تەرگەۋ بارىسىندا 780 ميلليون شۆەيسار فرانكى، سونىڭ ىشىندە جىلجىمايتىن مۇلىكتەر، قولما-قول اقشا جانە باعالى زاتتار تاركىلەندى.

وسى قىلمىستىق ءىس بويىنشا شۆەسيادا، فرانسيادا، نورۆەگيادا، نيدەرلاندتا، اقش پەن ۇلىبريتانيادا تاعى بىرنەشە ءىس قوزعالعان.

گۇلنارا كاريموۆانىڭ شەتەلدە 1،4 ملرد دوللارعا جۋىق اقشاسى بارى ءمالىم بولعان. وزبەكستان ۇكىمەتى سونىڭ ءبىر بولىگىن قايتارۋعا تىرىسىپ جاتىر.