بانكتىڭ شولۋىندا مۇعالىمدەردىڭ جالاقىسى ءبىرقاتار وسىمدەردەن كەيىن نارىقتىق باسەكەگە قابىلەتتى دەڭگەيگە (مەكتەپكە دەيىنگى ءبىلىم بەرۋدى قوسپاعاندا) جاقىنداپ كەلە جاتقانى اتاپ وتىلگەن. ءبىراق رەسپۋبليكاداعى ورتاشا وقۋشى مەن ءمۇعالىمنىڭ اراقاتىناسى (جالپى ورتا ءبىلىم بەرۋ ۇيىمدارىندا ءبىر مۇعالىمگە 9،5 وقۋشىدان) ەكونوميكالىق ىقتىماقتاستىق پەن دامۋ ۇيىمىنىڭ ورتاشا كورسەتكىشىمەن سالىستىرعاندا تومەن.                       

«ەل بويىنشا شاعىن مەكتەپتەردىڭ 40%-دا وقۋشى مەن ءمۇعالىمنىڭ اراقاتىناسى 4،4-كە دەيىن تومەن بولۋى مۇمكىن، ال كەيبىر مەكتەپتەردە مۇعالىمدەردىڭ سانى وقۋشىلاردان دا كوپ بولۋى مۇمكىن. بۇل كورسەتكىش اسىرەسە اۋىل مەكتەپتەرىندە كوپ. مۇعالىمدەردىڭ رەسمي جۇكتەمەسى قيسىنسىز جانە جۇيەنى ءتيىمسىز ەتەدى. سونىمەن قاتار، مىقتى ستۋدەنتتەر اراسىندا وقۋ ۇلگەرىمىن ارتتىرۋدى ىنتالاندىراتىن مۇعالىمدەرگە ەڭبەكاقى تولەۋ جۇيەسى («ستاۆكالار») جانە جالاقىنى ەسەپتەۋ، بىركەلكى دامىتۋ تۇرعىسىنان كاسىپتىڭ تيىمدىلىگىن ودان ءارى تومەندەتەدى»، – دەيدى دۇنيەجۇزىلىك بانك ساراپشىلارى.

جۇيە وقىتۋعا جانە ستۋدەنتتەرمەن جەكە جۇمىس جاساۋعا ساپالى ماتەريالداردى دايىنداۋدان گورى «ساعاتقا» كوبىرەك ۋاقىت ءبولۋدى ىنتالاندىرادى. بۇعان قوسا، وقۋشىنىڭ بار ءبىلىمىن اسىرا باعالاپ، كورسەتكىش ءۇشىن جوعارى باعا قويۋعا سەپتىگىن تيگىزۋى مۇمكىن.  

«ەڭبەكاقى تولەۋ جۇيەسى وزگەرتىلمەسە جانە جۇمىس جۇكتەمەسى وڭتايلاندىرىلمايىنشا، جالاقىنىڭ ءوسۋى مۇعالىمدەردىڭ تيىمدىلىگىنە اسەر ەتۋى نەمەسە ونىڭ جۇمىسىنىڭ جاقسارۋىنا اكەلۋى ەكىتالاي»، – دەپ قورىتىندىلادى دۇنيەجۇزىلىك بانك.

جالپى، مۇعالىمدەردىڭ جۇمىسى مەن بۇگىنگى پەداگوگيكالىق ءبىلىمنىڭ جاي-كۇيى الاڭداتادى. مەكتەپ ۇستازدارىنىڭ ءال-اۋقاتىن جاقسارتامىز دەپ جالاقىنى كوبەيتتى، تەرىس تۇسى سول بالعا ۇيمەلەگەن اراداي تۇلەكتەردىڭ ءبارى «ولمەيتىن ماماندىق» دەپ جاپپاي پەداگوگيكا سالاسىنا وقۋعا ءتۇسىپ جاتىر. ءىلىنىپ-سالىنىپ ءجۇرىپ، ۋنيۆەرسيتەتتى ارەڭ بىتىرگەندەر بۇگىندە ءبىر-بىر وقۋ ورداسىندا ساباق بەرىپ ءجۇر. سونداعىسى، بالالارىمىزدىڭ قانشالىق ساپالى ءبىلىم، نە ءتالىم الىپ جاتقانىن كىم ءبىلسىن؟!