پوستكەڭەستىك تەرريتورياداعى جانجالدىڭ ءبارى – ماسكەۋ جوسپارلاپ، ماسكەۋ جۇزەگە اسىراتىن جانجالدار. ماسكەۋ قولدان كيكىلجىڭ تۋعىزاتىن جاعداي جاسايدى، سوسىن بىتىمگەر رەتىندە اسكەرىمەن كىرىپ كەلىپ، ەلدەردى تاتۋلاستىرعانسىماق بولادى.
شىندىعىندا، رەسەيدىڭ بار دىتتەيتىنى – تاراپتار اراسىنداعى قايشىلىقتى پايدالانىپ، وڭىردەگى جاعدايدى ۋىسىندا ۇستاپ تۇرعان تورەشىدەي كورىنۋ.
تاۋلى قاراباقتاعى تاۋسىلماي كەلگەن داۋ دا سونداي سحەما ەدى. رەسەيدىڭ ماقساتى ارمەنيا مەن ازەربايجاندى ۋىسىنان شىعارماي ۇستاپ تۇرۋ بولاتىن.
ماسكەۋدىڭ ءوز مۇددەسى ءۇشىن بۇلارمەن ويىن ويناپ وتىرعانىن ارمەنيا مەن ازەربايجان ءتۇسىندى. ارتىندا تۇركيا تۇرعان ازەربايجان كۇنى كەشە بۇل داۋعا نۇكتە قويدى: قاراباق ازەربايجاننىڭ جەرى، ال وندا تۇراتىن ارميانداردىڭ قۇقىعى قاپتاعان ءتۇرلى حالىقارالىق كونۆەنسيالارعا سايكەس رەتتەلۋى ءتيىس.
رەسەي ەندى ارمەنيادان دا، ازەربايجاننان دا ايىرىلدى. ماسكەۋ جاقتان ويبايلاعان، زارلاعان داۋىستار ەستىلىپ جاتىر. تۇركيا رەسەيدىڭ وداقتاسى ەمەس. ەندەشە رەسەيدى ەندى كاۆكازدان ءتۇبى ءبىرجولا تەۋىپ شىعارادى.
رەسەيدى كاۆكازدان ىعىستىرۋدىڭ باسى باستالدى. ەرتەڭ شەشەنستاندى بيلەپ وتىرعان قادىروۆ دەگەن اۋمەسەر "اناۋ-مىناۋ" بوپ كەتسە، سول وڭىردە دە ۇلكەن وزگەرىستەر بولادى. سوندىقتان رەسەيلىكتەرگە كەش بولماي تۇرعاندا زاتتارىن ءبۋىپ-تۇيىپ، كاۆكازدان كوشىپ كەتۋ جاعىن ويلاستىرا باستاۋ كەرەك.
پىكىر قالدىرۋ