«مەن باعى زامان سارىنىنىڭ مۇراگەرىمىن. قۇداي بۇل اۋەندى، بۇل ەرەكشە سارىندى جايدان جاي ماعان قالدىرمادى. مەنىڭ بالالىق شاعىم، ونەرگە اكەلگەن العاشقى نوتامدا قازاق سارىنىمەن كەلگەن. ول مەنىكى، مەن ونىڭ يەسىمىن! مەن كەلەسى ۇرپاققا قولىمنان كەلگەنشە جاڭارتىپ قالدىرامىن. بۇل العا قويعان ۇلكەن ماقساتتىڭ ەڭ العاشقى باستاماسى»، – دەيدى ءانشىنىڭ ءوزى.

شىنايى ءسوز، جۇرەكجاردى لەبىز وسىلاي بولسا كەرەك. ۇشقىننىڭ اتاسى جامالبەك ءابدىر ۇلى ىلە وڭىرىندەگى اتاقتى كۇيشى ءاشىم ءدۇڭشىنىڭ شاكىرتى بولعان. اپاسى قامىرجان تەكەباي قىزى كۇنەس جەرىندەگى جيىن-تويدا قازاقتىڭ حالىق اندەرىن تامىلجىتىپ شىرقايتىن ءوز ورتاسىنا سىيلى انا. «سۋسامىر ەلدىڭ جايلاۋى-اي» دەپ سىزىلتا جونەلگەندە تىڭدارمان جۇرت سىلتىدەي تىناتىن. اۋىل اراسىنداعى تويلاردا اجەلەر بىر-بىرىنە اقىرىن عانا سىبىرلاپ، «اباي كوك» سياقتى ءبىر اۋەندى شىرقاي جونەلگەندە جينالعان قاۋىم تاڭداي قاعىپ، تامسانىپ جاتۋشى ەدى... ۇشقىن سونداي ورتادان شىققان باعزى اۋەننىڭ بۇگىنگى جالعاستىرۋشىسى.

قازاق ەستراداسىنا تىڭ سەرپىن، جاڭا ەكپىن اكەلگەن «الاش ۇلى» توبىنىڭ تۇگەلگە جۋىق شىعارماشىلىعى ۇشقىننىڭ قولتاڭباسى دەسەك ارتىق ايتقاندىق بولماس. ال بەلگىلى اكتەر، ءانشى اسەت ەسجاننىڭ ورىنداۋىنداعى «ءدۇر قامشى» ءانى ۇلتىم دەيتىن ازاماتتاردىڭ ۇرانىنا اينالعان. بۇل كۇندە ۇشقىن جامالبەك قۇرعان «Ugai» پروديۋسسەرلىك ورتالىعى جاڭا جۇلدىزداردىڭ تۇلەپ ۇشار ۇياسى، جاس ونەرپازداردىڭ قاناتقاقتى ءبىلىم ورداسى بولىپ تانىلدى. «مۇزبالاق» سىندى اندەرىمەن «بالاپان» ارناسىن كورەتىن بار قازاقتىڭ بالاسىن ۇلتتىق اۋەنگە تاربيەلەپ كەلەدى.

ۇشقىن الماتىداعى شاعىن كەشتى «SARYN-1» دەپ اتاپتى. ياعني قازاقتىڭ «سارىنى» سارقىلمايدى، ارى قاراي 2،3… دەپ جالعاسادى دەگەن ءسوز. بۇل كەشتە ءيىسى قازاققا تانىمال ايتىسكەر، قارا ءسوزدىڭ قارا نارى قايرات قۇل-مۇحامەت، تەاتر ونەرىنىڭ پروفەسسورى، حالىقارالىق، رەسپۋبليكالىق كونكۋرستاردىڭ جەڭىمپازى، ۇشقىننىڭ ۇستازى ماقسۇت وراز ۇلى جاڭا البومنىڭ تۇساۋىن كەسىپ، «سارىندى» سارى التىنداي جارقىراتقان انشىگە تىلەك باتاسىن بەردى.

ءبىر قۋانتارلىعى كىلەڭ جاستاردان قۇرالعان كەش كورەرمەندەرى دۋ قول شاپالاقپەن، ەرەكشە ىقىلاسپەن ۇشقىننىڭ اۋەنىنە تولقىدى. بۇل قوشامەت قازاقتىڭ ءتۇپساناسىنا تۇنعان دالالىق اۋەزدىڭ تىم ومىرشەڭ ەكەنىن، قازاق بار جەردە ۇلتتىق سارىننىڭ ۇمىتىلمايتىنىن پاش ەتتى.

داڭعوي اۋەن، داڭعازا مۋىزكاعا تولعان بۇگىنگى قازاق ەستراداسى تىم ارزانداپ كەتكەنى جۇرتقا ايان. وسىنداي كەزەڭدە سارا جولىن تاۋىپ، «سارىندى» قايتارعان، سانانى تۇلەتكەن، قارابايىر جىن ويناققا قامشى سالعان ۇشقىن جامالبەككە قازاق بالاسى ءدان ريزا دەپ ويلايمىز. «ەل بۇگىنشىل، مەنىكى ەرتەڭ ءۇشىن» دەگەن بايتۇرسىن ۇلىنىڭ ءسوزى وسى ۇشقىن سياقتى جاستاردىڭ ۇستانىمى بولسا كەرەك. ۇشقىن جالىندادى، جالىن لاۋلايدى، وت شوققا اينالادى... الاشتىڭ ءان الەمىنە ەرەكشە «سارىن»، ايرىقشا اۋەن قوسىلدى. تەكتى تۇيسىگى، تەرەڭ تامىرى بار ءار قازاق جارىق جۇلدىزدىڭ تەمىرقازىققا اينالعانىن سەزەر دەپ سەنەمىز.