«قاراعاندى كولىك پروكۋراتۋراسى اقىلى اۆتوموبيل جولدارىمەن ءجۇرۋ نەگىزدەرى تۋرالى شارتتا اۆتوكولىك جۇرگىزۋشىلەرىنىڭ قۇقىقتارىنا قايشى كەلەتىن تالاپتى انىقتادى» دەپ جازادى Qamshy.kz.

اقپارات بويىنشا، جەدەل جول قىزمەتتەرىن تۇتىنۋشىلار كولىك قۇرالىنىڭ مەملەكەتتىك تىركەۋ نومىرلىك بەلگىسىن اۋىستىرعان جاعدايدا پايدالانىلماعان تولەمدەردى قايتارا الاتىن تارماق بولماعان.

"قازىرگى تاڭدا شارتتارعا ءتيىستى تۇزەتۋلەر ەنگىزىلىپ، اقپارات بەرۋ ماقساتىندا "قازاۆتوجول" اق-تىڭ رەسمي سايتتارىندا ورنالاستىرىلدى (www.qaj.kz، www.1403.kz). سونىمەن قاتار پروكۋراتۋرانىڭ تالداۋى قاراعاندى وبلىسى بويىنشا 69 مىڭ اۆتوكولىك جۇرگىزۋشىسىنە 38 ملن تەڭگەدەن استام سوماعا اۆانستىق تولەمدەر قايتارىلماعانىن كورسەتتى. پروكۋراتۋرانىڭ ارالاسۋىنان كەيىن عانا تۇتىنۋشىلاردىڭ مۇلىكتىك قۇقىقتارىن قالپىنا كەلتىرۋ جۇمىستارى باستالدى"، – دەلىنگەن حابارلامادا.

ودان بولەك، ۇلتتىق وپەراتوردىڭ مۇددەلەرىن قورعاۋ وتە ءالسىز جۇرگىزىلگەنى انىقتالدى. سەبەبى، وسى قىزمەتتەردى 138 مىڭ تۇتىنۋشىنىڭ 3 جىل ىشىندە جالپى سوماسى 50 ملن تەڭگەگە بەرەشەگى جيناقتالعانى بەلگىلى بولدى.

"كوبىنەسە مۇنداي ادامدارعا قاتىستى ماتەريالدار اقىلى اۆتوموبيل جولدارىمەن جۇرگەنى ءۇشىن ۋاقتىلى تولەنبەۋ بەلگىلەرى بويىنشا ولاردى اكىمشىلىك جاۋاپكەرشىلىككە تارتۋ ماقساتىندا كولىكتىك باقىلاۋ ينسپەكسياسىنا جولدانباعان. پروكۋراتۋرانىڭ اكتىسى بويىنشا "قازاۆتوجول"اق فيليالىنىڭ باسشىلارى جول اقىسىن تولەمەگەن اۆتوكولىك جۇرگىزۋشىلەرىنە قاتىستى اكىمشىلىك ىقپال ەتۋ شارالارىنان الشاقتاتقانى ءۇشىن تارتىپتىك جاۋاپتىلىققا تارتىلدى"، – دەپ حابارلايدى باس كولىك پروكۋراتۋراسى.