تۇركىستان وبلىسىندا بالالارعا زورلىق جاسادى دەگەن كۇدىككە ىلىنگەن تۇرعىن ۇستالدى، دەپ حابارلايدى تۇركىستان وبلىستىق پوليسيا دەپارتامەنتىنىڭ باسپا ءسوز قىزمەتى.
"تۇركىستان وبلىسىنىڭ پوليسەيلەرى 33 جاستاعى اۋىل تۇرعىنى تاراپىنان كامەلەتكە تولماعان قىزدارعا قاتىستى قۇقىققا قايشى ارەكەتتەر جاساۋ فاكتىسى بويىنشا ەكى جەرگىلىكتى تۇرعىننىڭ ارىزىنا سايكەس سوتقا دەيىنگى تەرگەۋدى باستادى"، - دەيدى تۇركىستان وبلىسى پوليسيا دەپارتامەنتىنىڭ باستىعى مۇرات قابدەنوۆ.
جەدەل-ىزدەستىرۋ كەزىندە قىلمىس جاسادى دەگەن كۇدىكپەن وتىرار اۋدانىنىڭ تۇرعىنى ۇستالىپ، قاماۋعا الىنعان.
"مەنىڭ تاپسىرمام بويىنشا ارنايى جەدەل-تەرگەۋ توبى قۇرىلدى. قىلمىستىق كودەكسىنىڭ 120-بابى 4-بولىگى "زورلاۋ" بويىنشا قىلمىستىق ءىس قوزعالدى. بارلىق ءمان-جايدى انىقتاۋ ءۇشىن قاجەتتى ءىس-شارالار جۇرگىزىلىپ جاتىر. ەر ادام ءوز كىناسىن مويىندادى. ءتيىستى ساراپتامالار جاسالادى"، - دەيدى وبلىستىق پوليسيا دەپارتامەنتىنىڭ باسشىسى مۇرات قابدەنوۆ.
پوليسيا باستىعى تەرگەۋ اياقتالعانشا جالعان اقپارات تاراتىپ، ەلدى دۇرلىكتىرۋدەن اۋلاق بولۋدى سۇرادى.
"مۇنداي جايتتار بويىنشا مىندەتتى تۇردە ءجىتى باقىلاۋ بولادى، سوندىقتان سابىر ساقتاپ، زاڭ اياسىندا تەرگەۋ ناتيجەسىن كۇتۋلەرىڭىزدى سۇرايمىن"، - دەپ قوستى ول.
ەسكە سالساق، بۇعان دەيىن ادۆوكات ايمان وماروۆا ءوزىنىڭ الەۋمەتتىك جەلىدەگى پاراقشاسىندا تۇركىستان وبلىسىنىڭ تۇرعىنى كامەلەتكە تولماعان جەتى قىزدى زورلاعانىن ايتقان ەدى.
"بىزگە تۇركىستان وبلىسىنىڭ تۇرعىندارى "One-Stop-Service" جوباسىنا جۇگىندى، ءار ءتۇرلى وتباسىلاردان شىققان كەمىندە 7 قىز 1993 جىلى تۋعان ەر ادام تاراپىنان جىنىستىق زورلىق-زومبىلىققا ۇشىراعان. ولاردىڭ بارلىعى ءبىر تۇرعىن ۇيدە جانە ءبىر پودەزدە تۇرعان"، - دەپ جازدى ايمان وماروۆا.
پىكىر قالدىرۋ