مۇحتار ءابليازوۆ شاقىرعان ميتينگىگە قانشا قازاق شىقتى؟ الاڭعا شىققانداردان بۇرىن ۇيىندە تىنىش جاتقان جەرىنەن ۇستالعان بەلسەندىلەر كوپ بولدى بۇل جولى. ۇيىندە جاتىپ، ءالى ەشتەڭە ىستەپ ۇلگەرمەگەن ادامدى الىپ كەتۋ قانشالىقتى زاڭدى دەگەن سۇراق تۋادى. «قاسقىردىڭ اۋزى جەسە دە قان، جەمەسە دە قان» دەمەكشى، ەندى بەلسەندىلەردىڭ ءاربىر ميتينگ قارساڭىندا قامالاتىن ءتۇرى بار.

الاش ارىستارىن اباقتىعا قاماتتى، قويداي قىردى، دەپ كەڭەس ۇكىمەتىن ايىپتاعاندا جەلدەي ۇشىپ جەلپىنەمىز. ءقازىر شە؟ بۇگىنگى قازاقتىڭ اراسىندا دا قۋدالانعاندار قاتتى كوبەيىپ بارادى. سوڭعى ميتينگىگە حالىق ەمەس، ۇكىمەت جاقسىلاپ دايىندالدى. ءىىم 20 مىڭ پوليسيا قىزمەتكەرىن جۇمىلدىردى.

– ەگەر بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى زاڭناماسىن بۇزسا، ق ر اكىمشىلىك كودەكسىنىڭ 488-بابىنىڭ تالاپتارىنا ساي، اكىمشىلىك جازاعا تارتىلادى، ول باپتا قاماققا الۋ دا، ايىپپۇل دا بار. شەشىمدى سوت قانا قابىلدايدى. سوتتىڭ قاۋلىسى (شەشىمى) بولماي، قاماققا الۋ زاڭسىز. وسى باپتىڭ شەڭبەرىندە سوت قاراسا، 10-20 تاۋلىك ارالىعىندا قاماققا الا الادى. وسى باپتىڭ تارماقتارىنا ساي مەرزىم بەلگىلەنەدى. ال ەگەر ەشقانداي ايىپ، ياعني سوتتىڭ شەشىمىسىز قاماققا الۋ زاڭسىز، دەيدى زاڭگەر ەركەبۇلان قايرات ۇلى.

 امان مامبەتالى، ساياساتتانۋشى:

– ميتينگ داستۇرگە اينالىپ بارادى. ءابليازوۆ ساياسي كۇشتىڭ يەسى سياقتى كورىپ جۇرگەنىمەن، شىندىعىندا پياردان باسقا تۇگى جوق. ارتىنان ەرگەندەر بار، ءبىراق ونى تۇسىنەتىندەر از. ول تالاي جىل قاتارىنان مەديا كەڭىستىكتە پيار اكسيا ۇيىمداستىرىپ كەلەدى. وسى جولى دا ەلدىڭ، اسىرەسە مەملەكەت قىزمەتكەرلەرىنىڭ كوڭىلىن بۇرعىزىپ، ءوزىنىڭ بار ەكەنىن تاعى ءبىر كورسەتتى. ناقتى ۇسىنىپ وتىرعان ساياسي پروگرامماسى جوق، تازا پوپۋليزم. زەينەتكەرگە 300 مىڭ، كاسىپورىن جۇمىسشىلارىنا 1 ملن تەڭگە ايلىق قوسامىز دەگەنى «مەن پرەزيدەنت بولسام...» دەگەن بالانىڭ قيالىنا ۇقسايدى.

ميتينگكە كەلەتىن بولساق، مەنى دە بەيبىت شارالارعا قاتىسقانىم ءۇشىن 17 رەت اۋداندىق ىشكى ىستەر بولىمىنە اپارعان. ءبىزدىڭ ەلدە 30 جىلدا جۇيە بولىپ قالىپتاسقان ەليتانىڭ كوزقاراسى – پارتيا تەك ءبىر ادامعا بايلانىستى دەگەن تەرىس تۇسىنىگى. ءابليازوۆ تا سونداي قاتەلىككە ۇرىنىپ، مەن ليدەرمىن دەپ، ارتى ۇرىس-قىرىلىس بوپ، ءوزى جالعىز قالدى. دەموكراتيانىڭ فيلوسوفياسى ءبىر عانا پارتيا، ءبىر عانا كۇش ەمەس. ول اۋىسۋى كەرەك. بۇگىن وپپوزيسيا، ەرتەڭ بيلىك. ءبىر ايتارىم، زاڭ بار، ەگەر ول زاڭدى قابىلداماي، ونىڭ شەڭبەرىنەن تىس ارەكەت ەتسە، ارينە، قۋدالانادى. قوعامدا ءدال ءقازىر بيلىك وكىلدەرىنە، پوليسيا قىزمەتكەرلەرىنە كۇمان كوپ، سەنىم از. ءبىراق زاڭعا سالسا، ءبارى دۇرىستالادى.

مۇرات وتەباي ۇلى، ارداگەر جۋرناليست:

– سوزىلمالى سيپات العان داعدارىس، شەگىنە جەتكەن جەمقورلىق، سايلاۋداعى ادىلەتسىزدىك، باعا مەن تاريفتەردىڭ ءوسۋى، اەس سالۋعا دەگەن قارسىلىق سياقتى ءتۇرلى ماسەلەلەر حالىقتى ميتينگكە شىعۋعا يتەرمەلەيدى. ۇكىمەتكە دەگەن ءۇنىن وسىلاي عانا جەتكىزە الادى. بىرەر ادام شىقسا بولعانى، اكىمشىلىك جازاعا تارتىلىپ وتىر. بۇنى كەشەگى 25 قازانداعى جاعدايدان كورىپ وتىرمىز. سوندا حالىق باس قوسىپ، ءوز ويىن ايتا الماسا نە بولعانى؟! 20 مىڭ پوليسيانى جۇمىلدىرۋ دەگەن سۇمدىق ەندى. كەڭەستىك جۇيەدەگى قۋدالاۋ ءالى دە قالماپتى. بۇل حالىق نارازىلىعىن كۇشەيتە تۇسەدى. زاڭ شەكتەۋلى شەڭبەرىندە جۇمىس ىستەۋى كەرەك. بىزدە ءقازىر وپپوزيسيونەرلەر قالمادى. ءبارىن سوتتادى، تەمىر تورعا توعىتتى. تەك حالىقشىل ازاماتتار ءوز ويىن اشىق ايتقانى بولماسا، وپپوزيسيونەر جوق. ال دەپۋتاتتىق مانساپتا وتىرىپ، جەلپىنىپ سويلەپ جۇرگەندەر حالىققا ەمەس، ۇكىمەتكە جۇمىس ىستەيدى. «دەپۋتاتتار مىنا ماسەلەنى كوتەرىپ جاتىر» دەپ ەل سونشا ماقتايدى كەلىپ. ونىڭ ءبارى ۇكىمەتتىڭ تاپسىرىسىمەن، كەلىسىمىمەن عانا ايتىلىپ وتىر. بۇل «بەلسەندىلەردىڭ» تاريحىن جاقسى بىلەمىز. «امانات» ارقىلى قالاي سايلاۋعا وتكەنىن دە كوردىك. ايتپەسە ءوز ەركىمەن تۇسكەن ازاماتتاردىڭ ءبىرى دە وتكەن جوق. ساياسي رەفورما دەگەن ءسوز جۇزىندە عانا قالدى. جاسايتىندارى سول باياعى ءبىر كونفەرەنسيا مەن جينالىس.

تيك-توك الەۋمەتتىك جەلىسىنەن الىنعان پىكىرلەر