تاعى دا پەرىشتەلەر كوككە ۇشتى. حالىقتىڭ الەۋمەتتىك جاعدايىنىڭ تومەندىگىنەن.  جوقشىلىق، جالاقىنىڭ ازدىعى تالاي وتباسىن توزدىرىپ جاتىر.

اتاۋلى الەۋمەتتىك كومەك دەگەن جىرى قيىن نارسە بولدى. حالىققا ونى بەرمەۋدىڭ مىڭ ءتۇرلى سىلتاۋىن تاۋىپ قويعان. «ءبىر سيىرىڭ، بەس تاۋىعىڭ بار ەكەن، سەندەرگە ااك بەرسەك، جان باسىنا شاققانداعى تابىستارىڭ اسىپ كەتەدى» دەيدى.

كەشەگى اياگوزدە گاز جارىلىپ، 4 بالانىڭ قازاسىنا دا ااك سەبەپ بولدى. بالالاردىڭ اكەسى سانتەحنيك، اناسى جۇمىسسىز. اۋداندىق باسشىلار سيىرىڭ بار، تابىسىڭ كوپ دەپ، مەملەكەتتەن الاتىن ااك-تى كەسىپ تاستاپتى. بالالارىن اسىرايمىن دەگەن انا بازارعا ءسۇت ساتۋعا شىعىپ كەتكەن دەسەدى. ۇيىنە قايتىپ كەلگەندە، اۋىر قايعىعا دۋشار بولدى.

– اتاۋلى الەۋمەتتىك كومەكتىڭ ادامعا جەتۋىنە كوررۋپسيا كەدەرگى بوپ تۇرعانى جاسىرىن ەمەس. ااك-تى ەكى قاباتتى كوتتەدجدە تۇرىپ، دجيپ ءمىنىپ جۇرگەندەر دە الىپ جاتىر. سونىڭ كەسىرىنەن شىن مۇقتاج وتباسىلارعا بۇل كومەك تيە بەرمەيدى. سەبەبى، سيىر ساۋىپ، قولدان ءسۇت ساتسا دا مەمورگانداردىڭ كوزىنە «وليگارح» سەكىلدى كورىنىپ، جاردەماقىنى الىپ تاستايدى. ااك-تى الۋ ءۇشىن تاقىر كەدەي بولۋ كەرەك. وسى «كەدەيلىك شەگى، مۇگەدەكتىك دالەلى» دەگەن كەرىتارتپالىقتاردى الىپ تاستاۋ كەرەك. ءقايبىر جىلى ءبىر اياعى جوق، مۇمكىندىگى شەكتەۋلى كىسى «جىلدا مۇگەدەك ەكەنىڭدى دالەلدەۋىڭ كەرەك، ءبىراق اياق قايتا وسپەيدى عوي» دەپ جىلاعان. سول سەكىلدى كەدەيلىكتى ۇنەمى دالەلدەۋ كەرەك پە؟ ءتيىستى زاڭ قابىلدانۋ ءۇشىن، انا بالالاردىڭ جانىندا بولۋ ءۇشىن ءالى قانشاما ءسابي قۇربان بولۋى كەرەك، – دەيدى جۋرناليست كامشات تاسبولات.

قازاقستاندا ااك تاعايىندالۋى ءۇشىن وتباسى مەملەكەتتىك ورگاندار شىعارعان تالاپتارعا سايكەس بولۋ كەرەك. ياعني، ااك وتباسىنىڭ ءاربىر مۇشەسىنە شاققانداعى تابىسى ەڭ تومەنگى كۇنكورىس دەڭگەيىنەن 70 پايىز تومەن بولعاندا تاعايىندالادى. كەدەيلىك شەگى 35 789 تەڭگە مولشەرىندە بەلگىلەنگەن. بۇل كومەك بيىل 107،8 مىڭ وتباسىنداعى 565،7 مىڭ ادامعا عانا تاعايىندالعان.

قوعام بەلسەندىسى ساۋلە ءابىلداحان قىزى اتاۋلى الەۋمەتتىك كومەكتى تەك كوپبالالى وتباسىلار نە كەدەي وتباسىلار عانا الماۋى كەرەك، ەلىمىزدە ارنايى «انا مەن بالا» كاپيتال قورى قۇرىلسىن دەيدى.

– اقىرى مەملەكەتتەن بولىنەتىن قارجى عوي. ماسەلە – ونى قالاي بەرۋدە. ادەمى، مادەنيەتتى ۇيىمداستىرۋعا بولادى عوي! ونىڭ بىردەن ءبىر جولى «انا مەن بالا» كاپيتالى» مەملەكەتتىك قورىن قۇرىپ، سول ارقىلى ءار بالاعا جەكە شوت اشۋ. ول شوت بالاعا عانا تيەسىلى شوت بولۋ كەرەك، – دەيدى ول.