استانانىڭ قىلمىستىق ىستەر جونىندەگى سوتى تىركەلمەگەن "العا، قازاقستان" باستاماشىل توبىنىڭ جەتەكشىسى، بەلسەندى مارات جىلانبايەۆقا ۇكىم شىعارىپ، 7 جىلعا سوتتادى. وعان "تىيىم سالىنعان ۇيىمنىڭ قىزمەتىنە قاتىستى" جانە "ەكسترەميزمدى قارجىلاندىردى" دەگەن ايىپ تاعىلدى. 

سوت وتىرىسى جابىق تۇردە ءوتتى. پروكۋرور تىركەلمەگەن "العا، قازاقستان" باستاماشىل توبىنىڭ جەتەكشىسى مارات جىلانبايەۆتى 10 جىلعا سوتتاۋدى سۇراعان. 

– زاڭسىز تەرگەۋدەن باستالعان ءىس زاڭسىز ۇكىممەن اياقتالدى. ۇكىمدى ءسوزسىز اپەللياسياعا بەرەمىز. ماعان سوتتىڭ حاتشىسى 16:45-تە حابارلاسىپ، ونلاين سوت 16:55-تە وقىلاتىنىن ايتتى. ءسۇيتىپ Zoom-نىڭ سىلتەمەسىن بەردى. ساعات 16:55-تە كىرگەن كەزدە سوت ۇكىمدى اياقتاپ جاتىر ەكەن. تەك 7 جىل دەگەنىن عانا ەستي الدىم. قوسىمشا شەكتەۋلەردى ەستىگەن جوقپىن. سوت ۇكىمىن قولعا العاننان كەيىن بەلگىلى بولادى، – دەدى ادۆوكات ازاتتىق سايتىنا بەرگەن پىكىرىندە. 

مارات جىلانبايەۆتىڭ سوتى 30 قازاندا باستالعان ەدى. بەلسەندىلەر بيلىك مارات جىلانبايەۆتى ساياسي سەبەپپەن قۋدالانىپ وتىرعانىن ايتادى. ال تەرگەۋ ورگاندارى بەلسەندىنى قۋعىنداعى ەكس-بانكير مۇحتار ءابليازوۆ قۇرعان «قازاقستاننىڭ دەموكراتيالىق تاڭداۋى» (قدت) قوزعالىسىنا قاتىسى بار دەپ بولجايدى.