- كوپتەگەن اقپارات قۇرالدارى ءالى كۇنگە دەيىن مينيسترلىك ۇكىمەتتى اشىق سىناي الماي وتىر. بۇنى اشىق ايتۋىمىز كەرەك. ايتپەگەندە، ەلىمىزدەگى ساياسي وقيعالار مەن جەمقورلىققا قاتىستى مەملەكەتتىك اقپارات قۇرالدارىنىڭ تەرەڭىرەك ماتەريالداردى زەرتتەۋگە، جازۋعا شاماسى جەتپەيدى ەمەس، جەتەدى. ءبىراق بۇل جەردە سەنزۋرا بار. ءبىز وسى سەنزۋرانى، قول بايلاۋدى توقتاتۋىمىز كەرەك. ناقتى لوتپەن جازىلۋى ءتيىس. سول كەزدە باسقا تاۋەلسىز اقپارات قۇرالدارى دا قاتىسا الادى. باسەكەلەستىك تە بولادى. بۇقارالىق اقپاراتتىق الاڭدا ءدال ءقازىر ءبىز جەڭىلىپ جاتىرمىز. وسى جەردە كەلىسپەيتىن، ەڭ داۋلى ماسەلە – پرەسس كارتا. وسىعان توقتالۋىمىز كەرەك. ياعني، پرەسس-كارتانى الۋىڭ ءۇشىن «سەن جۋرناليستيكانى ءبىتىرۋىڭ كەرەك» دەگەن شارت بار. بىزدە جۋرناليستيكا فاكۋلتەتىن بىتىرمەي-اق ۇلكەن اقپارات قۇرالدارىندا رەداكتور بولىپ وتىرعان قانشاما ءمۇيىزى قاراعايداي جۋرناليستەر وتىر. ولاردى قايتەمىز؟ قانشا دەگەنمەن، بۇل مينيسترلىكتىڭ جانىنان قۇرالادى. ياعني، ەرتەڭ شەنەۋنىكتەرگە ىڭعايسىز سۇراق قويعان ارىپتەستەرىمىز ەرتەڭ قۋدالاۋعا ۇشىراپ جۇرمەي ما؟
سونداي-اق دەپۋتات ەلىمىزدەگى باق-تى تۇركيانىڭ اقپارات قۇرالدارىمەن سالىستىرۋدىڭ قيسىىنسىز ەكەنىن ايتادى.
- بىزدە تۇركيانىڭ تاجىريبەسى كوپ ايتىلادى. تۇركيا ءسوز بوستاندىعى جاعىنان رەيتينگىسى قازاقستاننان الدەقايدا تومەن. ەندەشە، ءبىز ءسوز بوستاندىعى تومەن ەلدەن ۇلگى الاتىنىمىزداي باسىمىزعا نە كۇن تۋدى؟ سوندىقتان بۇل جەردە الالاۋ بار سەكىلدى. ولاي بولسا، ەگەر دە كەرەمەت جۇيە بولاتىن بولسا، ونى بالاما تۇردە قالدىرا بەرىڭدەر. ال اككريديتاسيا قالسىن. جۋرناليستەرگە ۇناپ جاتسا، ەرىكتى تۇردە وزدەرى تاڭداۋىنا مۇمكىندىك بولسىن، – دەيدى ماقسات تولىقباي.
پىكىر قالدىرۋ