ەكو-نى العاش رەت قازاقستانعا ەندوكرينولوگ سالتانات بايقوشقاروۆا اكەلگەن بولاتىن. سودان بەرى «اڭساعان ءسابي» باعدارلاماسى اياسىندا 5 مىڭنان استام بالا ەكو ارقىلى دۇنيەگە كەلدى. بۇل قۋانىشتى جاڭالىق.

دەسەك دە، حالىق اراسىندا ەكو-مەن تۋعان بالالار ۇرپاق جالعاستىرا الا ما، دەگەن سۇراق بولدى. بىلتىر قازاقستاندا ەكو ارقىلى دۇنيەگە كەلگەن 2004 جىلعى قىز تابيعي جولمەن انا بولدى. ول ەندوكرينولوگ سالتانات بايقوشقاروۆاعا جازعان حاتىندا بىلاي دەگەن:

– سالتانات حانىم، ءوز وقيعاممەن بولىسسەم دەپ ەدىم. مەن ءسىزدىڭ قولىڭىزدان ەكو-مەن دۇنيەگە كەلگەن قىزبىن. انام 2004 جىلى دۇنيەگە الىپ كەلدى. 10 جىل دەگەندە كورگەن قىزى ەدىم. مەنەن سوڭ انام تاعى ءبىر ۇلدى دۇنيەگە الىپ كەلدى. ءبىراق ول تابيعي جولمەن تۋعان. مەن بولسام، ەكو-مەن تۋعان قىزدار بەدەۋ بولادى، ۇلدار ۇرپاق جالعاستىرا المايدى دەگەن سوزدەردى كوپ ەستيمىن. سونى ويلاپ ۋايىمدايتىنمىن. ءبىراق ونىڭ وتىرىك اڭگىمە ەكەنىن ءتۇسىندىم. تۇرمىس قۇرعان سوڭ 2 ايدان سوڭ جۇكتى ەكەنىمدى ءبىلدىم. قۋانىشىمدا شەك بولمادى. جۇكتىلىگىم جاقسى ءوتتى. امان-ەسەن بوسانىپ، سالماعى 3،5 كەلى ءسابيىمدى دۇنيەگە اكەلدىم، دەيدى.

حالىقتىڭ كوكەيىندەگى ساۋالدىڭ جاۋابى وسى. ءبىراق ەكو-مەن تۋعان قىز انا بولدى، ال ۇلدار جاعى قالاي بولماق، دەگەن ۋايىم بار ءالى. بۇل ساۋالعا «ەكومەد» ادام ۇرپاعىن ءوربىتۋ كلينيكاسىنىڭ عىلىمي ديرەكتورى سالتانات بايقوشقاروۆا بىلاي جاۋاپ بەرەدى:

– ەكو ءادىسى ەلىمىزدە 27 جىلدان بەرى ءساتتى قولدانىلىپ كەلەدى. الەمدە بۇل ادىسپەن تۋعان 10 ميلليونعا جۋىق بالا ءومىر سۇرۋدە. سوندا دا وسى ۋاقىتقا دەيىن ەكو توڭىرەگىندەگى ءتۇرلى ساۋالدار كوپ. سونىڭ ءبىرى ەكو ارقىلى تۋعان ۇل بالا ۇرپاق جالعاستىرا الا ما، دەگەن سۇراق. ارينە، ولار اكە بولا بولادى. جاساندى جولمەن تۋعان بالانىڭ تابيعي جولمەن تۋعان بالادان ەش ايىرماشىلىعى جوق. تاعى ءبىر ايتا كەتەرلىگى، 95 پايىزعا جۋىق جاعدايدا بەدەۋلىك جۇرە پايدا بولادى. ياعني، ومىردە بولعان سۋىق تيۋ، ينفەكسيا، وپەراسيالاردان كەيىنگى قابىنۋ پروسەستەرى، جاتىردان تىس جۇكتىلىك، ابورت، ەكولوگيا، كۇيزەلىس سياقتى فاكتورلاردىڭ سەبەبىنەن كوبىنەسە جۇرە پايدا بولادى، دەيدى ول.