ماڭعىستاۋدا ءوندىرىس بازاسىندا ەرەۋىلگە شىققان 500-گە جۋىق مۇنايشى 4 كۇننەن بەرى دالادا تۇنەپ ءجۇر. مۇنايشىلاردىڭ پرەزيدەنتكە جاساعان ۆيدەوۇندەۋى الەۋمەتتىك جەلىدە تارادى. 11 جەلتوقساننان بەرى ەرەۋىلگە شىققان مۇنايشىلار كومپانياداعى ەڭبەك جاعدايىنىڭ ناشار ەكەنىن، قولدانىستاعى تەحنيكانىڭ توزىعى جەتكەنىن ايتادى. 

"ءبىز، ماڭعىستاۋ وبلىسىنداعى West Oil Soft ware جۇمىسشىلارى بۇعان دەيىن زاڭ اياسىندا ءوز تالاپتارىمىزدى قويعانبىز. تالابىمىز ورىندالماي قالدى. وسى تالاپتاردى ورىنداماعاندىقتان، ءبىز كونستيتۋسيالىق قۇقىعىمىزدى پايدالانا وتىرىپ، توتەنشە شارالار قولداندىق.  اتاپ ايتقاندا، 11 جەلتوقساندا كوشەگە شىقتىق"، - دەيدى.

سونداي-اق جۇمىسشىلار ءبىرىڭعاي جالاقى تولەۋ جۇيەسىن ەنگىزۋدى، ءوزىن قازمۇنايگاز كومپانياسىنا قايتارۋدى تالاپ ەتىپ وتىر. 

ال ماڭعىستاۋ وبلىسى بويىنشا مەملەكەتتىك ەڭبەك ينسپەكسياسى WestOilSoftware كومپانياسى قىزمەتكەرلەرىنىڭ ارەكەتىنە باعا بەردى. ولاردىڭ 3 تالابىنىڭ ەكەۋى "ەڭبەك اربيتراجىنىڭ وتىرىسىندا ەسكەرتىلگەن" ەڭبەك داۋىنا نەگىز بولمايدى دەپ وتىر.

"جۇمىسشىلاردىڭ ءبىر تالابى قاناعاتتاندىرىلدى، سوندىقتان جۇمىسشىلاردىڭ ەرەۋىلگە شىعۋى ەڭبەك زاڭناماسىنا سايكەس، نەگىزسىز بولىپ تۇر. ءبولىم باسشىسى اتالعان كاسىپورىن قىزمەتكەرلەرىنىڭ تالاپتارى بويىنشا ەڭبەك زاڭناماسىنىڭ نورمالارىن ءتۇسىندىردى. بۇل تالاپتار داۋدى جانە پروبلەمالىق ماسەلەلەردى شەشەتىن مۇمكىندىكتى قاراستىرۋ ءۇشىن قۇرىلعان كەلىسىم كوميسسياسى مەن ەڭبەك اربيتراجىنىڭ وتىرىسىندا قارالدى. وسىلايشا، ءۇش تالاپتىڭ ءبىرى – كولىكتەر مەن ارنايى تەحنيكالاردى جاڭعىرتۋ "قازمۇنايگاز" جانە "مۇناي كولىك كورپوراسياسى" كومپانيالارىنىڭ وكىلدەرىمەن بىرنەشە رەت تالقىلاندى. 16 قاراشادا وتكەن ەڭبەك اربيتراجىنىڭ وتىرىسىندا كوپشىلىك داۋىسپەن "قازمۇنايگاز" كومپانياسى ۇسىنعان باعدارلاما بويىنشا كولىك تەحنيكاسىن جاڭارتۋ تالابىن قاناعاتتاندىرۋ تۋرالى حاتتامالىق شەشىم قابىلداندى"، - دەپ حابارلادى ۆەدومستۆو وكىلى .