قاعاز جۇزىندە تۋرا وسىلاي بولىپ تۇر.
شىندىعىندا ەل كەدەيلەنىپ بارادى. جۇرگىزىلگەن ساۋالناما ناتيجەلەرى قازاقستان ازاماتتارىنىڭ 5،6%-ىنىڭ تابىسى ەڭ تومەنگى كۇنكورىس دەڭگەيىنەن دە تومەن ەكەنىن كورسەتتى.
ەلىمىزدە ەڭ تومەنگى كۇنكورىس دەڭگەيى 51 710 تەڭگە. كەدەيشىلىكتىڭ ەڭ جوعارى دەڭگەيى تۇركىستان وبلىسىندا – 9،6%، ال ەڭ تومەنى قاراعاندى وبلىسى مەن استانا قالاسىندا – 2،7% تىركەلدى. بەس جانە ودان دا كوپ ادامى بار وتباسىلارداعى كەدەيشىلىك دەڭگەيى 10% قۇرادى، بۇل كەدەيشىلىكتىڭ ورتاشا دەڭگەيىنىڭ ەكى ەسەسى. تابىسى ەڭ تومەنگى كۇنكورىس دەڭگەيىنەن از قازاقستان تۇرعىندارىنىڭ سانى ەكىنشى توقسانمەن سالىستىرعاندا 9 پايىزعا ءوسىپ، 1،1 ميلليون ادامنان استى. بۇل سوڭعى 13 جىلداعى ەڭ جوعارعى كورسەتكىش.
ءبىراق BBC سايتىندا قازاقستاندا ءسوز ەركىندىگى تاپتالىپ، ءباسپاسوزىن بيلىك باقىلايتىنى، وپپوزيسيالىق باسىلىمداردىڭ ءبارى دەرلىك جابىلىپ، شىنشىل جۋرناليستەرى شەتەلگە قاشاتىنى جازىلدى. وپپوزيسيالىق باسىلىمداردىڭ بارلىعى دەرلىك جابىلدى نەمەسە جەر اۋدارىلدى، ال قالعانى «ايىپپۇلدىڭ قىسىمىمەن كۇيرەدى». رەسەيلىك راديوستانسيالار كابەلدىك جانە سپۋتنيكتىك ارنالار ارقىلى تاراتىلاتىنى دا ايتىلعان. ينتەرنەت «جاپپاي باقىلاۋ، بلوگەرلەردى تۇرمەگە جابۋ جانە جاڭالىقتار سايتتارىنا، الەۋمەتتىك جەلىلەر مەن حابار الماسۋ قىزمەتتەرىنە كىرۋگە ءجيى شەكتەۋلەرمەن قاتاڭ باقىلاۋدا ەكەنىن شەتەلدىكتەر دە جەتە ءبىلىپ وتىر.
بۇۇ سايتىندا بيشىمبايەۆتىڭ ءىسى تۋرالى ماقالا جاريالاندى. دەپۋتاتتار بۇنى قازاقستاننىڭ يميدجىنە نۇقسان كەلدى دەپ قابىلدادى. ال قازاقتىڭ ايگىلى جەلاياعى مارات جىلانبايەۆ 7 جىلعا سوتتالعانى بيلىكتىڭ يميدجىنە داق تۇسىرمەي مە؟
ال قازاق بيلىگى سىرت الەمگە ءمىنسىز ەتىپ كورسەتكىسى كەلەدى. نەگە؟
– سىرت كوزگە جاقسى كورىنۋ ءۇشىن «دەموكراتيا دەكوراسياسىن» جاسايدى. بۇل بيلىكتى ساقتاپ قالۋدىڭ ءبىر ءتاسىلى. قازاقستاننىڭ حالىقارالىق ءيميدجى قازاقستان بيلىگىنە وتە كەرەك. ءبىراق قازىرگى الەمدە ەل پرەزيدەنتتەرىنىڭ بەدەلىنە ەشكىم كوڭىل بولمەيدى. تەك كىم قاي تاراپتى قولدايدى دەگەن كوزبەن عانا قارايدى. توقايەۆ ديپلومات بولعان سوڭ ءوزىن جاقسى كورسەتۋ ءۇشىن بىرەسە رەسەيمەن، بىرەسە باتىسپەن وينايدى. ول ءوز ماقساتىمەن ءوزىنىڭ اتموسفەراسىندا جۇرگەن سياقتى. جاستاردىڭ توقايەۆتى قولدايتىنىن كورسەتۋ ءۇشىن «جاڭا ادامدار» دەگەن قوزعالىس قۇرىلدى. بۇل رەسەيدەگى «ناشي» دەگەن ۇيىم ىسپەتتى. ارنايى قۇرىلعان جوسپار. ولار بيلىكتەن بولەك كورىنۋگە تىرىسادى، بەلگىلى مولشەردە شىندىقتى ايتقانداي بولادى. ءبىراق نەگىزگى باعىتتارى ايقىن. قۇرىلىمدىق دەڭگەيدە تەك «نۇر وتاننىڭ» جاستار پارتياسى عانا تانىلعان، سول سياقتى توقايەۆتىڭ بيلىگىن، ونىڭ «جاڭا قازاقستان» ۇرانىن قولدايتىندار كەرەك. مۇنىڭ پىسىپ-جەتىلگەن ۋاقىتى كەلدى، سوندىقتان تاڭدانبادىم.
ال مارات جىلانبايەۆ سياقتى بەلسەندىلەردى سوتتاۋ توقايەۆتىڭ اتىنا پالەندەي داق تۇسىرە قويمايدى. سپورتشىنىڭ گيننەسس رەكوردتار كىتابىنا كىرگەنى راس. ءبىراق ول كىتاپقا نەگىزىنەن قىزىقتى دا، سونىمەن بىرگە ءبىرتۇرلى جانە كۇلكىلى رەكوردتار ەنەدى. جىلانبايەۆتىكى ادام اعزاسىنىڭ توزىمدىلىگىن كورسەتەتىن سپورتتىق رەكورد، الايدا كىتاپقا ەنگەن سوڭ ەل وعان قىزىقتى رەكورد ەسەبىندە قارايدى. ويتكەنى، گيننەسس رەكوردتارى سىرا ءىشىپ وتىرىپ قارايتىن كىتاپ رەتىندە جاسالعان، دەيدى ساياساتكەر دوس كوشىم.
