بيىل جاڭا جىلدى تويلاۋ مەن قالانى ساندەۋگە الماتى قالاسىنىڭ اكىمدىگى 714 ملن تەڭگە قۇرتپاق. وتكەن جىلى وسىعان 600 ملن تەڭگە جۇمساعان.

استانا اكىمدىگى قالانى ساندەۋگە، مۇز ايدىنى سياقتى شىعىندارىن تۇگەل ەسەپكە العاندا 825 ملن تەڭگە بولگەن ەكەن.

الماتى قالالىق مادەنيەت باسقارماسى قالاداعى ءار اۋداندى بولەك بەزەندىرىپ، سىرتقى ديزاين قىزمەتتەرىن ساتىپ الۋ بويىنشا 8 حابارلاندىرۋ جاريالاپتى. مەملەكەتتىك ساتىپ الۋلار سايتىنداعى دەرەكتەر قالانىڭ ءاربىر اۋدانىنا كەمىندە 65 ملن تەڭگە بولىنگەنىن كورسەتەدى.

بۇل قىزمەتتى كورسەتۋشى رەتىندە ءتورت كومپانيا تاڭدالعان: «Magic Wood» ج ش س، «PR – Capital Media» جك، «Expedit Group» ج ش س جانە «B-Grass» ج ش س. ولار ءار اۋداندا بيىكتىگى ون مەترلىك مەرەكەلىك شىرشا ورناتادى، ول گيرلياندالارمەن جانە ويىنشىقتارمەن بەزەندىرىلەدى.

Factcheck.kz رەداكسياسىنىڭ زەرتتەۋىنشە، بۇل الماتى اكىمدىگىنىڭ قالانى كورىكتەندىرۋگە جوسپارلاعان بارلىق شىعىندارى ەمەس. قالانىڭ باس شىرشاسى تۇراتىن اباي الاڭىن جوبالاۋعا تاعى 66 ملن تەڭگە، جارىقتاندىرۋ مەن بەزەندىرۋگە 65 ملن تەڭگە، شاعىن ساۋلەت فورمالارىن جوندەۋگە 46 ملن تەڭگە ءبولدى.

“حالىققا ءبىر تيىندى ارتىق قيمايتىن، نە باسپانا، نە جەر تەلىمىن قيمايتىن، اۋرۋ بالالاردىڭ، ناۋقاس حالىقتىڭ ەمىنە قيمايتىن، نە كرەديتىن جاۋىپ بەرۋگە قيمايتىن جۇزدەگەن ميلليوندار جىلدا وسىلاي ءبىر شىرشامەن جوق بولادى” دەپ، جۋرناليست ساۋلە ءابدىلداحان قىزى قالاي ءدوپ باسىپ ايتقان دەيمىز.

راس قوي، الگى ميلليوندار شاشىلعان شىرشالاردىڭ ءبىرى قۇلاپ جاتىر، ءبىرى ورتەنىپ جاتىر شەتىنەن.

راس ايتادى جۋرناليست: “داراقىلىق پەن جاساندىلىقتان، وتىرىك پەن پونتتان اسا الماي قالدى بۇلار. 30 جىلدىق اۋرۋدان جازىلۋ وڭاي ما؟”.