5 اقپان پرەزيدەنت قاسىم-جومارت توقايەۆ ۇكىمەتتى وتستاۆكاعا جىبەردى. مينيسترلەر كابينەتىندە بالكىم كەيبىرى ءوز ورنىندا قالار، ءبىراق ەكى جىلدان استام ۋاقىت پرەمەر-مينيستر بولعان ءاليحان سمايىلوۆ قوشتاسۋ پوستىن جازىپ، قايتىپ كەلمەيتىنىن ءبىلدىردى. ول پوستىندا:

«توقايەۆقا سىندارلى ۋاقىتتا قازاقستان رەسپۋبليكاسىنىڭ ۇكىمەتىن باسقارۋعا سەنىم بىلدىرگەنى ءۇشىن زور العىسىمدى بىلدىرەمىن. وتكەن ەكى جىل قوعام ءۇشىن شەشۋشى كەزەڭ بولدى. وتكەن جىلدىڭ قورىتىندىسى بويىنشا ەكونوميكانىڭ ءوسۋى 5،1%ء-تى قۇرادى. بارلىق نەگىزگى سەكتورلار وڭ دامۋ ديناميكاسىن كورسەتتى. ينفلياسيا ەكى ەسەگە تومەندەتىلدى»،  – دەيدى.

دەگەنمەن، كوپشىلىكتىڭ پوستقا جازعان پىكىرىنەن سمايىلوۆقا كوڭىلى تولماعانىن بايقاۋعا بولادى. ماسەلەن، 

«ءبارى جاقسى بولسا، نەگە ۇلتتىق قوردان اقشا الدىڭ؟ نەگە زەينەتاقى قورىنىڭ اقشاسىن جەس سالۋعا جۇمسايىن دەپ جاتىرسىڭدار؟»، «ءۇمىت اقتالمادى، جەمقورلىق ادام شوشىتارلىق دەڭگەيگە جەتتى. قورعانىس، دەنساۋلىق، الەۋمەتتىك، «قازاۆتوجول»، ءبىلىم سالاسى مينيسترلەرى جۇمىسى وتە ناشار. وبلىس، اۋدان باسشىلارى تەك تامىر-تانىس، تۋعان-تۋىستارىن جۇمىسقا تاعايىنداۋدا. حالىقتىڭ سەنىمىنە يە بولاتىن ۇكىمەت باسشىسى مينيسترلەر سايلانسا دەگەن ءۇمىتىمىز قاشان اقتالار ەكەن؟»، «ءسىز ۇكىمەتتى باسقارعان كەزەڭدە بيۋروكراتيا شىڭىنا جەتىپ، كوررۋپسيا قاتتى دامىعان شاققا تۇسپا-تۇس كەلدى. بۇل ولقىلىقتاردى توقتاتۋعا ۇكىمەتتىڭ ءالى جەتپەدى»، «ءبىرىنشى رەت الەۋمەتتىك جەلىدەن كورۋىم. جان-جاعىنا جالتاقتامايتىن، تۋراشىل ادام كەرەك قوي، بولماسا قاجىگەلديندى شاقىرتسىن»، «ءوز باسىم سىزگە جاقسى باعا بەرە المايمىن، ايتارلىقتاي جەتىستىكتەر جوق، حالىقتان الشاق بولدىڭىز. ءبىراق مامينگە قاراعاندا قازاقستاندا پرەمەر-مينيستر بار ەكەنى كورىنىپ تۇردى. الداعى ۋاقىتتا شىن قابىلەتىڭىز جەتەتىن، ءسۇيىپ  جۇمىس ىستەڭىز دەپ وتىنەمىن»، «بۇل ۇكىمەت ساياسي-ەكونوميكالىق داعدارىسقا الىپ كەلدى. تىپتەن بۇل وكىمەت كەلمەۋ كەرەك ەدى» دەگەن سارىنداعى پىكىرلەر وتە كوپ.

ەسكە سالا كەتسەك، 51 جاستاعى سمايىلوۆ قازاقستاننىڭ پرەمەرى لاۋازىمىن 2 جىل ءبىر اي اتقاردى.