قازاقستاننىڭ مەديسينالىق مەكەمەلەرىندە ماسكا رەجيمى قايتا ورالدى. ازاماتتارعا حالىق كوپ جينالاتىن ورىنداردا دا بەتپەردە كيۋ ۇسىنىلدى. ءتيىستى قاۋلىعا ەلدىڭ باس مەملەكەتتىك سانيتاريالىق دارىگەرى قول قويدى.
قاۋلى حالىق اراسىندا اۋا-تامشى جولى ارقىلى بەرىلەتىن ينفەكسيالىق اۋرۋلاردىڭ (قىزىلشا، COVID-19، تۇماۋ جانە باسقا دا ءجىتى رەسپيراتورلىق ۆيرۋستىق ينفەكسيالار) تارالۋىنىڭ الدىن الۋ ماقساتىندا قابىلدانعان.
بارلىق وڭىرگە مەديسينالىق ۇيىمداردا پەرسونال مەن كەلۋشىلەردىڭ مەديسينالىق بەتپەردە تاعۋىن جانە انتيسەپتيكتەردىڭ بولۋىن قامتاماسىز ەتۋ تاپسىرىلدى.
سونداي-اق حالىق اراسىندا كوروناۆيرۋس، تۇماۋ مەن جرۆي پروفيلاكتيكا شارالارى تۋرالى ءاقپاراتتىق-تۇسىندىرۋ جۇمىستارى جۇرگىزىلەدى.
بۇعان قوسا دەنساۋلىق ساقتاۋ مينيسترلىگى قازاقستاندىقتارعا حالىق كوپ جينالاتىن ورىنداردا (اۋەجاي، تەمىرجول ۆوكزالى، اۆتوۆوكزال، بازار، ساۋدا-ويىن-ساۋىق ورتالىعى، ساۋدا ءۇيى، تەاتر، كينوتەاتر، حقكو، بانكتەر جانە ت.ب.)، سونىمەن قاتار كولىكتىڭ بارلىق تۇرىندە (قوعامدىق كولىك، اۋە، تەمىر جول كولىگى) مەديسينالىق نەمەسە ماتادان تىگىلگەن ماسكالاردى پايدالانۋعا كەڭەس بەردى.
وسى قاۋلى قول قويىلعان كۇننەن باستاپ كۇشىنە ەنەدى.
پىكىر قالدىرۋ