زەينەتاقى قورىنان 170 ملرد تەڭگە «بايتەرەك» حولدينگىنە بولىنگەن ەكەن. ول قاراجات جۇك جانە جولاۋشىلار ۆاگوندارىن ساتىپ الۋعا جۇمسالادى. بۇل تۋرالى ۇلتتىق ەكونوميكا ءمينيسترى بولعان الىبەك قۋانتىروۆ مالىمدەگەن بولاتىن. ونىڭ تۇسىندىرۋىنشە، زەينەتاقى قورىنداعى اقشانى ينۆەستيسيالاۋدىڭ ەڭ ءتيىمدىسى ءارى سەنىمدىسى – «بايتەرەك» حولدينگى.

زەينەتاقى قورى – حالىقتىڭ جيناعان اقشاسى، ارينە حالىق بۇعان الاڭداۋلى.

– 15 جىل بويى 13% كىرىستىلىك بەرىپ تۇرعان «بايتەرەك» پەن «سامۇرىق-قازىنا» وبليگاسيالارى ءبىزدىڭ زەينەتاقى قارجىمىزدى كوبەيتۋگە جاقسى ىقپال ەتپەك. 173 ميلليارد تەڭگەدەن ءبىز جىل سايىن 22،49 ميلليارد تەڭگە كىرىستىلىك الامىز دەپ ساناساق، 15 جىلدا ول 337،35 ميلليارد تەڭگە بولادى. سوندا 173 ميلليارد تەڭگە 510 ميلليارد تەڭگە بولىپ قايتپاق. جوعارى ينفلياسيا فازاسىنان وتتىك دەپ سانالعاندىقتان، ءتىپتى قازىرگى ساتپەن مودەلدەسەك، 9،8% بولاتىن ينفلياسيا ءمانىنىڭ ۇستىنەن 3،2% كىرىستىلىك الىپ وتىرامىز. سوندىقتان بۇل حالىق ءۇشىن ءتيىمدى، – دەيدى ەكونوميست ايبار ولجاي.

بۇدان ءقاۋىپ بولماي ما، حولدينگكە قۇيىلعان قارجى ەرتەڭ قۇمعا سۋ سەپكەندەي بولماي ما، دەگەن سۇراققا قارجىگەر بىلاي دەيدى: 

– «بايتەرەك» پەن «سامۇرىق-قازىنا» جەكە كومپانيالار ەمەس. ولاردىڭ بارلىق مىندەتتەمەلەرى، قارىزدارى مەملەكەت تاراپىنان كەپىلدەندىرىلەدى. سوندىقتان قازاقستاننىڭ سۋۆەرەندى رەيتينگى (S&P: BBB-/ا-3، Fitch: BBB تۇراقتى) قانداي، ەكى حولدينگتە دە سونداي رەيتينگ بولادى. قاراپايىم تىلمەن ايتساق، ولار 100 پايىز سەنىمدى، العان اقشاسىن نە بولسا دا قايتارا الاتىن الپاۋىت ۇيىمدار. سوندىقتان بۇل مامىلە حالىق ءۇشىن ءقاۋىپسىز.

زەينەتاقى قورىندا 18،7 تريلليون تەڭگە اۋىر جۇك بولىپ جاتىر. جاتا بەرسىن دەسەك، ونى ينفلياسيا جەپ قويادى. تابىستىلىق قۋىپ ستارتاپتاردىڭ اكسيالارىن، نەمەسە كريپتوۆاليۋتا ساتىپ الايىق دەسەك، وندا انىق اقشامىزدى جوعالتۋىمىز مۇمكىن. حالىقتىڭ اقشاسىمەن ويناۋعا بولمايدى. سول ءۇشىن ۇلتتىق بانك بارىنشا ساقتىقپەن، 100 پايىز قايتاتىنىنا سەنىمدى، سونىمەن بىرگە تابىستىلىعى ينفلياسيادان جوعارى بولاتىن قۇندى قاعازداردى ىزدەپ، سولارعا ينۆەستيسيا جاسايدى، – دەدى ەكونوميست.