قالالىق پوليسيا باسقارماسىنىڭ باسپا ءسوز قىزمەتى ءمالىم ەتكەندەي، ءىس-شارا بارىسىندا پوليسەيلەر جول ءجۇرۋ ەرەجەلەرى تالاپتارىنىڭ ساقتالۋىن قاداعالايدى. سونىڭ ىشىندە تاكسيلەردىڭ جولاۋشىلاردى، باگاجدى تاسىمالداۋ ەرەجەلەرىن ساقتاۋىن تەكسەرەدى.

    5 اقپاننان بەرى ءتارتىپ ساقشىلارى جولاۋشىلاردى زاڭسىز تاسىمالداعان 9 تاكسي جۇرگىزۋشىسىن انىقتادى. سونداي-اق كولىكتى ءنومىرسىز باسقارعان 46 جۇرگىزۋشى ۇستالدى. 380 جۇرگىزۋشى مىندەتتى تەحنيكالىق تەكسەرىستەن وتپەگەن. بۇدان بولەك 500-دەن استام جۇرگىزۋشى جولاۋشىلار مەن جۇكتەردى تاسىمالداۋ تالاپتارىن ساقتاماعان.

    - شارا بارىسىندا پاترۋلدىك پوليسەيلەر "حيۋنداي" اۆتوكولىگىن باسقارعان 35 جاستاعى وزبەكستان ازاماتىن انىقتادى. شەتەلدىك ءتيىستى تىركەۋ قۇجاتتارىنسىز "ياندەكس" موبيلدىك قوسىمشاسى ارقىلى جولاۋشىلاردى تاسىمالداپ جۇرگەن. وزبەكستان ازاماتىنا قاتىستى كوشى-قون زاڭناماسىن بۇزعانى ءۇشىن اكىمشىلىك حاتتاما جاسالدى. ال كولىگى كوممۋنالدىق تۇراققا قويىلدى، - دەپ اتاپ ءوتتى ۆەدومستۆو.