ۇلىتاۋ وبلىسىندا ءۇش جەتىم بالانى قۇلشا ۇستاعان وگەي انا قۇرىقتالدى

/image/2024/02/19/crop-3_198_1075x1434_dina.jpg

«5 جىل بويى فەرمادا ەڭبەك ەتىپ، «قۇلدىقتا» بولعان بالالارعا، ۇلىتاۋعا بارىپ كەلدىم. ۇلىتاۋ وبلىسى اكىمى بەرىك ءابدىعالي ۇلى، پروكۋراتۋرا، ىىم-مەن اتالمىش ءىستىڭ ءمان-جايى مەن قاجەتتى شارالاردى زەردەلەدىك. اقپاننىڭ باسىندا وبلىستىق پروكۋراتۋرا مەن قامقورشىلىقتىڭ ءموبيلدى توپتارىنىڭ تەكسەرىسى ناتيجەسىندە ءبىر وتباسىنان شىققان ءۇش بالا - ءبىر قىز جانە ەكى ۇل انىقتالدى. پاتروناتتىق وتباسى ولاردى بالالار ۇيىنەن 2018 جىلى، بالالار 14، 12 جانە 8 جاستا بولعاندا العان. بالالاردىڭ ۇلكەندەرىن قالادان 20 شاقىرىم قاشىقتىقتاعى ءوز فەرمالارىندا ۇستاپ، مال باعۋعا ماجبۇرلەگەن. فەرمادا ەكى ءۇيىر جىلقى جانە 18 سيىر بار» دەپ جازدى قازاقستانداعى بالا قۇقىقتارى بويىنشا ۋاكىل دينارا زاكييەۆا جەلىدە.

فەرمادا بولعان كوميسسيا مۇشەلەرى بالالاردىڭ ءومىر ءسۇرۋ جاعدايلارىن كورىپ، جاعالارىن ۇستاعان. ال بالالاردىڭ ءۇستى-باسى ادام شوشىرلىق. دەنەلەرىنىڭ ءار جەرى تىرتىققا تولى، كوگەرگەن، ۇستەرى كىر-قوجالاق، كيىمدەرى جىرتىق. ابدەن جاداپ-جۇدەگەن. كوزدەرىندە ۇشقىن دا جوق. وسىدان-اق ءۇر توقپاقتىڭ استىنا الىنعان بالالار ەكەنى كورىنىپ تۇر. ال ولارعا مەملەكەتتەن بەرىلەتىن جاردەماقىنى قامقورشى ءوز قاجەتتىلىكتەرىنە جۇمساپ كەلگەن.

«بالالاردىڭ ۇلكەنى – قىز بالا، كوللەدج بىتىرگەن، الايدا ءىس جۇزىندە ساباققا بارماعان. ورتانشى ۇل بالا دا كوللەدجدە «وقيدى». ورگاندار وقۋ ورىندارىن تەكسەرسە، ولارعا ۇنەمى بالالاردىڭ اۋىرعانى تۋرالى انىقتامالار ۇسىنىلىپ وتىرعانى انىقتالعان. قامقورشى قىز بالانى جۇمىس ىستەمەسەڭ، نە شاعىمدانساڭ، باۋىرلارىڭدى كورمەيسىڭ دەپ قورقىتقان. بەلگىلى بولعانداي، بۇل قامقورشى جاقىندا پاتروناتقا الۋعا بولاتىن باسقا دا بالالار بار ما دەپ سۇراستىرعان ەكەن»، دەيدى زاكييەۆا.

ءقازىر بالالار بىرگە، ءقاۋىپسىز جەردە. ولارعا پسيحولوگيالىق كومەك كورسەتىلىپ جاتىر. وبلىس اكىمى بالالارعا قولايلى جاعداي جاساۋ، كومەك كورسەتۋ، بالاردىڭ قايدا تۇراتىنىن، قايدا وقيتىنىن جەكە باقىلاۋىنا الدى.

ال بۇگىن اسىراندى بالالارىن بەس جىل بويى قارا جۇمىس كۇشى رەتىندە پايدالانعان وگەي انا قاماۋعا الىنعانى بەلگىلى بولدى. 

“كەشە اتقارىلعان جۇمىس كەزىندە ۇلىتاۋ وبلىسىندا بالالاردى قۇل قىلعان ايەل ۇستالىپ، تەرگەۋ يزولياتورىنا قامالدى”، دەپ جازدى ومبۋدسمەن.

 

پىكىر قالدىرۋ

قاتىستى ماقالالار