بۇل تۋرالى سيفرلىق دامۋ ءمينيسترى باعدات مۋسين ايتتى.
"الماتىعا جابدىقتى قابىلداۋ بارىسىن ارنايى تەكسەرۋ ءۇشىن كەلدىم. كەلەسى اپتادا تۇركىستان جانە اقمولا وبلىستارىنداعى Starlink ورناتۋعا تولىق دايىن مەكتەپتەرگە جابدىقتاردى جەتكىزۋ باستالادى. اتالعان وبلىستاردىڭ اكىمدىكتەرى بارلىق دايىندىق جۇمىسىن جاقسى جۇرگىزدى. قالعان وڭىرلەرگە 10 كۇننەن كەيىن كەلەتىن كەلەسى كەزەكتە جەتكىزىلەدى. بارلىعى 20 كۇن ىشىندە 2000 جيناق كەلەدى، ولار ەلدەگى 2000 شالعايداعى اۋىل مەكتەبىن جوعارى جىلدامدىقتى ينتەرنەتپەن قامتاماسىز ەتەدى"، دەدى مينيستر.
سونداي-اق مۋسين بۇل مەملەكەت باسشىسىنىڭ شەشىمىنىڭ ارقاسىندا جۇزەگە اسىپ جاتقانىن ناقتىلاي كەتتى.
ايتا كەتسەك، قاسىم-جومارت توقايەۆ 2023 جىلى 12 قاراشا Digital Bridge فورۋمى اياسىندا SpaceX كومپانياسىنىڭ Starlink ماسەلەلەرى جونىندەگى ۆيسە-پرەزيدەنتى لورەن درەيەرمەن كەزدەسىپ، شەتەلدىك تاراپ ءوز ءونىمىن قازاقستانعا جەتكىزۋگە نيەتتى ەكەنىن، بۇل اۋىلدارداعى ساپاسىز ينتەرنەت ماسەلەسىن جويۋعا بولاتىن مۇمكىندىك ەكەنىن جەتكىزگەن ەدى.
Starlink - ساپاسىز، قىمبات نەمەسە مۇلدە قولجەتىمسىز جەرلەردى جوعارى جىلدامدىقتاعى ينتەرنەتپەن قامتاماسىز ەتۋدى ماقسات ەتەتىن SpaceX كومپانياسى وربيتاعا شىعارعان عالامدىق سپۋتنيكتىك جۇيەسى. قازىرگى ۋاقىتتا عارىشتا SpaceXء-تىڭ 5000-نان استام توپتاستىرىلعان Starlink جەرسەرىكتەرى بار.
پىكىر قالدىرۋ