قازاقستانداعى جەمقورلىق باسقاسىن ايتپاعاندا كادىمگى مەكتەپتە دە ءورشىپ تۇر. بالامىزعا ءبىلىم بەرەتىن سالادا دا تۇيەنى تۇگىمەن جۇتاتىندار جۇرگەن سوڭ نە سۇرايسىز؟

 جۋىردا الماتى وبلىسى ىلە اۋدانى ءبىلىم ءبولىمىنىڭ باسشىسىنىڭ 680 ملن تەڭگە جىمقىرعانى جاعا ۇستاتتى. سۇمدىق قوي، سۇمدىق بوپ جاتىر. سوڭعى ءبىر ايدىڭ قازاقستان بويىنشا ءبىرتالاي مەكتەپ ديرەكتورى، مەكتەپ بۋحگالتەرلەرى، ءبىلىم ءبولىمىنىڭ باسشىلارى ۇستالدى. ءالى ۇستالماعانى قانشا دەسەڭىزشى.

بالىق باسىنان ءشىريدى. بەلگىلى ۇستاز اياتجان احمەتجان ۇلىنىڭ سوزىنشە، مەكتەپتىڭ باسشىسى باستاماسا، بۋحگالتەرلەر ءوز بەتىمەن قارجىنى جىمقىرا المايدى.

– ءبىز بۇرىن «جەمقور شەنەۋنىك» دەگەندى ءجيى ەستۋشى ەدىك، ەندى ءقازىر جەمقور ەسەپشى، جەمقور ديرەكتور دەگەندى ايتاتىن بولدىق. بىزدەگى جەمقورلىق تۇتاس جۇيەدە، سودان قوعامنىڭ وزىنە سىڭىرىلگەن. مەكتەپتەگى جەمقورلىق بۇگىن باستالعان جوق، بۇرىننان بار. تەك سوڭعى جىلدارى ورتا ءبىلىم سالاسىنداعى جەمقورلىق شەتىنەن اشىلىپ جاتىر. دۇرىس، اشىلا بەرسىن، جەمقورلىق جويىلماي ادىلەتتى قوعام بولمايدى، ءبىز ىلگەرى باسپايمىز.

بىرىنشىدەن، مەكتەپ ديرەكتورلارى ەكونوميكا مەن قارجى جاعىنان، ەسەپشىلەر ءوز ماماندىعى مەن IT تۇرعىسىنان ساۋاتسىز. كەيدە باسشىسى ساۋاتسىز بۋحگالتەر بىلگەنىن ىستەيدى. كەي ديرەكتور قول قوياتىن ەلەكتروندى سيفرلىق قولتاڭباسىن بۋحگالتەرگە بەرىپ، سولارعا سەنىپ وتىرا بەرەدى.

مەن ءقازىر مەكتەپتە ديرەكتور بولىپ جۇرگەن جانداردى ەكى توپقا بولەمىن. ءبىرى – ۇزاق ۋاقىت باسشىلىق قىزمەتتە جۇمىس ىستەپ ۇيرەنىپ قالعاندار، ەكىنشىسى – ماقساتتى تۇردە ديرەكتور بولعاندار. ماقساتى – اقشا، ءمانساپ بولعاندار. ولار شاماسى كەلسە ءوزى جەيدى، نەمەسە بۋحگالتەرىنە جەگىزتەدى. ءدال وسى جەردە جۇيەنى رەتتەمەي، بۇل جەمقورلىقتى تىزگىندەۋ مۇمكىن ەمەس. ءقازىر ەلىمىزدە 500-دەن استام مەكتەپتە ديرەكتور جوق، مىندەتىن اتقارۋشىلار وتىر. ولار – ۋاقىتشا، امالسىز وتىرعاندار. ەكونوميكالىق ماسەلەگە باس قاتىرعىسى كەلمەيدى. سوندىقتان دا بۋحگالتەرگە جەۋگە جەڭىل. سونداي-اق، كەي وڭىرلەردە مەكتەپكە جۇمىسقا تۇرۋ 2،5 ملن تەڭگە تۇرادى ەكەن، ونى انتيكور دا، اكىمدىك تە، ەلدىڭ ءبارى دە بىلەدى. ءبىراق ءبارى تۇك بىلمەگەندەي بوپ وتىر. نەگە؟ وسىدان-اق ءبارى تۇسىنىكتى.

مەكتەپ جەمقورلىقتان قۇتىلماي، مەملەكەت جەمقورلىقتان ەشقاشان قۇتىلمايدى. نەمەسە كەرىسىنشە، مەملەكەت جەمقورلىقتان قۇتىلماي، مەكتەپ جەمقورلىقتان قۇتىلمايدى، – دەدى ۇستاز.