اسسامبلەيانىڭ كەزەكتەن تىس وتىرىسىندا جاسوسپىرىمدەر قۇراماسىنىڭ 2024 جىلعى وڭتۇستىك كورەيادا وتكەن IV قىسقى جاسوسپىرىمدەر وليمپياداسىنداعى ناتيجەسى قورىتىندىلانىپ، شىلدە ايىندا پاريجدە وتەتىن جازعى وليمپيادا ويىندارىنا دايىندىعى تالقىلاندى، سونداي-اق، ۇوك قۇرىلتاي قۇجاتتارىن زاڭ نورمالارىنا سايكەس وزەكتەندىرۋ، ۇوك باسقارۋ ورگاندارىنىڭ وكىلەتتىك مەرزىمىن ءبىر مەرزىمگە جەتكىزۋ ماسەلەلەرى جانە 2015-2023 جىلدار ارالىعىنداعى قازاقستان ۇوك قىزمەتىنىڭ كورسەتكىشى ءسوز بولدى. 

ق ر ۇوك پرەزيدەنتى تيمۋر قۇلىبايەۆ باس اسسامبلەيا مۇشەلەرىنە ۇيىم پرەزيدەنتى رەتىندەگى وكىلەتتىگىن مەرزىمىنەن بۇرىن توقتاتۋ تۋرالى شەشىم قابىلدانعانىن حابارلادى. 

باس اسسامبلەيا مۇشەلەرىنىڭ داۋىس بەرۋ قورىتىندىسى بويىنشا ق ر ۇوك پرەزيدەنتى بولىپ -  قازاقستاندىق بوكسشى، 2004 جىلعى افينى وليمپياداسىنىڭ كۇمىس جۇلدەگەرى، كوپتەگەن  اتاقتىڭ يەسى گەنناديي گولوۆكين سايلاندى. 

«جاڭا لاۋازىمدا ەلىمىزدىڭ اتىنان ارەكەت ەتۋ - مەن ءۇشىن زور مارتەبە. ماعان قازاقستان ۇلتتىق وليمپيادالىق كوميتەتىن باسقارۋدى ۇسىنعاندا، قازاقستاندىق سپورتتى دامىتۋعا ءوز ۇلەسىمدى قوسۋعا مۇمكىندىك بەرسە عانا،  كانديداتۋرامدى ۇسىناتىنىمدى ايتتىم. 

وزدەرىڭىز بىلەتىندەي، مەن ساياساتكەر دە، شەنەۋنىك تە ەمەسپىن. ءوز ارەكەتىمدى سوزبەن ەمەس، ىسپەن دالەلدەپ ۇيرەنگەنمىن. ءبىزدىڭ الدىمىزدا تۇرعان ەڭ ماڭىزدى مىندەتتەردىڭ ءبىرى -  حالىقارالىق قارىم-قاتىناستى رەتتەۋ دەپ بىلەمىن. 

وسى ورايدا، مەنىڭ ءوز كوزقاراسىم، جىلدار بويى جينالعان حالىقارالىق تاجىريبەم بارىن، كوماندا بارىن ايتقىم كەلەدى. ال ەڭ باستىسى جانە مەنىڭ كوپتەن بەرگى قالاۋىم – بۇل بارلىعىن دا ءوزىمنىڭ تۋعان ەلىمدە جۇزەگە اسىرۋ»، - دەدى جيىندا ءسوز العان گولوۆكين.