تۇندە جانە تاڭەرتەڭ كەيبىر ەل ازاماتتارى توسىنسىيعا تاپ بولعان.

بۇگىن جۇمىسىنا ەرتە جانە كەش بارعان ادامدار دا تابىلىپ جاتىر. بۇل جايت ەلىمىزدىڭ ءبىرىڭعاي ۋاقىت بەلدەۋىنە كوشۋمەن تىعىز بايلانىستا. ماسەلەن، تەلەفونىنداعى ساعاتىن تۇنگى 00-00-دە ءبىر ساعات كەرى شەگەرىپ، جاتىپ قالعان ادام تاڭەرتەڭ جۇمىسقا ەرتە بارعان. سەبەبى تەلەفونداعى ۋاقىتتى وزگەرتەتىن اۆتوماتتى فۋنكسيا تۇندە ىسكە قوسىلىپ، ساعات ءتىلىن تاعى ءبىر ساعاتقا كەرى جىلجىتقان.

سول سەكىلدى تەلەفونىنداعى ساعاتى اۆتوماتتى تۇردە وزگەرەدى دەپ بەك سەنگەن كەيبىرەۋى جۇمىستان ابايسىزدا كەشىككەن. ويتكەنى تەلەفونداعى ۋاقىتتى اۆتوماتتى وزگەرتەتىن فۋنسيا، ءاۋ باستا، ءوشىرىلۋى بولعان. تەك وسى فۋنكسيانى قوسقاندا ساعات ءتىلى وزدىگىنەن وزگەرەتىنىن كەيبىرى كەيىن ءبىلىپ، ايران-اسىر بولىپ جاتىر.

ودان بولەك، ءبىرى قىزىعى، كەيبىر قازاقستاندىقتاردىڭ ەلەكتروندىق قۇجاتتارىنداعى تۋعان كۇنى وزگەرىپ كەتكەن. ءقازىر ەلەكتروندى ۇكىمەتتەن سيفرلىق قۇجاتتى كورۋ مۇمكىن بولماي تۇر.

"مەملەكەتتىك قىزمەت ساعات 12-30-دا قولجەتىمدى بولادى"، دەگەن جازۋ تۇر ول جەردە. سوعان قاراعاندا بۇل رەتتە اقاۋلاردى انىقتاپ، جوندەۋ جۇمىستارى جۇرگىزىلىپ جاتقان سەكىلدى.