34 جاستاعى قىزىلوردالىق 2019-2022 جىلدار ارالىعىندا الەۋمەتتىك جەلى ارقىلى Qnetء-تى جارنامالاپ، قارجىلىق پيراميداعا 59 ادامدى تارتقان. سالدارىنان قارجىلىق الاياقتىق قۇرباندارى 63 ميلليوننان استام تەڭگەسىنەن قاعىلعان.

"قىزىلوردا وبلىسى بويىنشا ەكونوميكالىق تەرگەپ-تەكسەرۋ دەپارتامەنتىمەن 2019-2022 جىلدارى قىزىلوردا قالاسى مەن قىزىلوردا وبلىسىنىڭ اۋماعىندا Qnet قارجى پيراميداسىن قۇرۋ جانە باسقارۋ فاكتىسى بويىنشا 11.10.1990 جىلى تۋعان قازاقستان رەسپۋبليكاسىنىڭ ازاماتى جۇبانايەۆ الماس ورازالىۇلىعا حالىقارالىق ىزدەۋ جاريالانادى. وعان قاماۋدا ۇستاۋ تۇرىندە بۇلتارتپاۋ شاراسى تاعايىندالدى" دەلىنگەن قارجىلىق مونيتورينگ اگەنتتىگى تاراتقان حابارلامادا.

اگەنتتىك مالىمەتىنشە، كۇدىكتى زاڭسىز قىزمەتىن جۇزەگە اسىرۋ بارىسىندا Instagram الەۋمەتتىك جەلىسىن پايدالانۋ ارقىلى الماتى، شىمكەنت جانە قىزىلوردا قالالارىنان ادامداردى تارتىپ، ترەنينگتەر جانە ۇگىت-ناسيحات جۇمىستارىن جۇرگىزگەن.

جابىرلەنۋشىلەردىڭ جالپى سانى – 59 ادام، كەلتىرىلگەن زالال سوماسى – 63 373 356 تەڭگە.