قازاقستاندىقتار تار دارىگەرلەرگە تەراپيەۆتتىڭ جولداماسىنسىز بارا الادى. دەنساۋلىق ساقتاۋ مينيسترلىگى مەديسينالىق كومەك كورسەتۋ ستاندارتتارىنا ءتيىستى وزگەرىستەر ەنگىزدى.
وزگەرىستەرگە سايكەس، ناۋرىز ايىنان باستاپ جوسپارلى ەمدەۋگە جاتقىزۋعا ارنالعان تالداۋلار تىزبەسىن 42 زەرتتەۋگە قىسقارتۋ، سونداي-اق ولاردىڭ قولدانىلۋ مەرزىمىن 10 كۇننەن 14 كۇنگە دەيىن جانە 1 ايدان 3 ايعا دەيىن ۇلعايتۋ جوسپارلانۋدا.
ءساۋىر ايىنان باستاپ بەيىندى ماماندارعا تىكەلەي جۇگىنۋ تاسىلدەرى جەتىلدىرىلەتىن بولادى. ناۋقاس كەلەسى جاعدايلاردا جالپى پراكتيكا دارىگەرىنىڭ جولداماسىنسىز بەيىندى ماماندارعا جۇگىنە الادى:
- شۇعىل جاعدايلار مەن جاراقاتتار، سونىڭ ىشىندە وفتالمولوگيالىق، وتورينولارينگولوگيالىق جانە باسقا دا جاراقاتتار؛
- شۇعىل جانە جوسپارلى ستوماتولوگيالىق كومەك كورسەتۋ؛
- دەرماتوۆەنەرولوگيالىق بەيىندەگى اۋرۋلار؛
- تىركەلگەن جەرى بويىنشا اكۋشەر-گينەكولوگ پەن پسيحولوگتىڭ قابىلداۋى؛
- ونكولوگ جانە ونكوگەماتولوگتىڭ قابىلداۋى؛
- ديسپانسەرلىك ەسەپتە تۇرعان پاسيەنتتەر ءۇشىن كارديولوگ، ەندوكرينولوگ، وفتالمولوگ، نيەۆروپاتولوگ، حيرۋرگ قابىلداۋلارى؛
- بەيىندى مامانعا ونى تاعايىنداۋ بويىنشا قايتا قابىلداۋ؛
- جاستار دەنساۋلىق ورتالىقتارىندا ماماندار قابىلداۋ؛
- جىلجىمالى مەديسينالىق كەشەندەردىڭ جانە باسقا دا ءموبيلدى قىزمەتتەردىڭ قىزمەتتەرىن كورسەتۋ كەزىندە.
"ءساۋىر ايىنان باستاپ ديناميكالىق باقىلاۋ ءتارتىبى جانە جالپى پراكتيكا دارىگەرى مەن بەيىندى مامانداردىڭ بىرلەسكەن جۇمىس الگوريتمى قايتا قارالادى، بۇل كوپسالالى ءتاسىلدى قامتاماسىز ەتەدى. وسى جۇمىس شەڭبەرىندە زەرتتەۋلەردى جۇرگىزۋدىڭ ەسەلىگى مەن كولەمى ءاربىر پاسيەنت ءۇشىن جەكە - جەكە انىقتالاتىن بولادى"، - دەپ حابارلادى دەنساۋلىق ساقتاۋ مينيسترلىگى.
پىكىر قالدىرۋ