جاڭا زاڭ جوباسى پارلامەنت دەپۋتاتتارى مەملەكەت باسشىسىنىڭ 2023 جىلعى جولداۋىندا ايتىلعان ەنەرگيا تيىمدىلىگىن ارتتىرۋ جانە «جاسىل» تەحنولوگيالاردى ەنگىزۋ جونىندەگى تاپسىرماسىن ورىنداۋ ماقساتىمەن ازىرلەندى.

   ءماجىلىس دەپۋتاتى دۇيسەنباي تۇرعانوۆ:

  -  "جاڭارتىلاتىن ەنەرگيا كوزدەرىن پايدالانۋ جونىندەگى شاعىن اۋقىمدى وبەكت” ۇعىمى العاش رەت ەنگىزىلىپ وتىر. بۇل – قۋاتتىلىعى 200 مۆت-تان اسپايتىن جەل، كۇن جانە باسقا دا بالامالى ەلەكتر ستانسالارى. تومەن قۋاتتى جاڭارتىلاتىن ەنەرگيانىڭ مۇنداي كوزدەرىن شاعىن جانە ورتا بيزنەستىڭ، شارۋا جانە فەرمەر قوجالىقتارىنىڭ، سونداي-اق جەكە جانە كوپپاتەرلى ۇيلەردىڭ قاجەتتىلىكتەرى ءۇشىن پايدالانۋعا بولادى، - دەيدى.

   ياعني، مۇنداي قوندىرعىلاردىڭ يەلەرى ارتىق وندىرىلگەن ەلەكتر ەنەرگياسىن ەنەرگيامەن جابدىقتاۋشى ۇيىمعا ساتا الادى. ول ءۇشىن جاڭارتىلاتىن ەنەرگيا كوزدەرى نىسانىنىڭ يەسى جەكە كاسىپكەر رەتىندە تىركەلۋگە مىندەتتەلمەيدى. ەلەكتر ەنەرگياسىنىڭ شەكتى باعاسىن تابيعي مونوپوليالاردى رەتتەۋ كوميتەتى بەلگىلەيدى.

  ۋاكىلەتتى ورگاندار كەدەرگىلەردى جويا وتىرىپ، جاڭارتىلاتىن ەنەرگيا كوزدەرىنىڭ شاعىن كولەمدەگى وبەكتىلەرىن جالپى ەلەكتر جەلىسىنە قوسۋ ەرەجەلەرىن بەكىتەدى. سونداي-اق نەتتو-تۇتىنۋشىلاردان ەلەكتر ەنەرگياسىن ساتىپ الۋ-ساتۋ بويىنشا ۇلگىلىك شارتتار ازىرلەنەدى.