توكسيكوز بولىپ، ءۇيىمىزدىڭ بەرەكەسىن الدىڭ دەپ ۇراتىن
“وتاۋ قۇرعانىمىزعا 12 جىل بولدى. 12 جىلدا 4 بالالى بولدىق. وقىعان، توقىعان ازاماتقا تۇرمىسقا شىققانىما قۋانعان ەدىم. ۇيلەنگەنىمىزگە 1 اي تولعاندا قول كوتەرىپ باستادى. سونداعى سەبەبى “توكسيكوز بولىپ، ءۇيىمىزدىڭ بەرەكەسىن الدىڭ” دەيتىن. كەيىننەن بولماشى ءتۇرلى سەبەپتەردى ايتىپ، ۇرۋىن ۇدەتە ءتۇسۋدى. العاشىندا تۇرمىسقا جاڭا شىقتىم عوي دەپ قالدىم. كەيىننەن اياعىم اۋىر عوي دەپ، سوسىن ۇيات بولار دەپ جۇرگەنىمدە 12 جىل ءوتىپتى. 12 جىلدا تولاسسىز قول كوتەرۋلەرىنەن قابىرعام، مۇرنىم سىنىپ، باسىمنان گەماتوما بولىپ اۋرۋحانالارعا جاتىپ شىقتىم. كىشى ەكى قىزىم اكەلەرىنەن قورىققاننان تىلدەرى شىقپاي قالدى. ال ۇلدارىم وتە اگرەسسيۆنىي بولىپ ءوسىپ كەلەدى. ورايى كەلسە، ماڭايىنداعى ادامداردى ساباپ جىبەرۋگە دايىن. ءوزىم تۇقىمىمدا جوق ەپيلەپسيا اۋرۋىنا شالدىقتىم. سالتاناتتىڭ ولىمىنەن كەيىن 4 بالامنىڭ تاعدىرىن ويلاپ، كەتۋگە شەشىم قابىلدادىم”،-دەيدى “جانسايا” داعدارىس ورتالىعىن پانالاعان ن.ەسىمدى ازاماتشا.
ماعان عانا ەمەس، جەڭگەسىمەن، اپاسىنا دا قول كوتەرەتىن
مەن كۇيەۋىممەن 3 جىل تۇردىم. 1 ۇلىمىز بار. كۇيەۋىم شاڭىراق كوتەرگەن سوڭ 6 ايدان كەيىن “كينوعا ءوز پىكىرىڭدى ايتتىڭ” دەپ قول كوتەرىپ باستادى. ال مەن جاي عانا بىرلەسىپ كورگەن كينومىز تۋرالى ويىمدى ايتقان ەدىم. تۇك تۇسىنبەي قالدىم. ءوزىم پسيحولوگ ماماندىعىن بىتىرگەنمىن. كۇيەۋىم دە دارىگەر. وسى ۇرعاننان كەيىن قايتالاي بەردى. مەنىڭ ءار كۇنىم جىلاۋمەن وتە باستادى. پسيحولوگ رەتىندە اگرەسسياسىنىڭ سەبەبى نە ەكەنىن انىقتاعىم كەلدى. سويتسەم ەنەمە دەگەن اشۋدان تۋعان سياقتى. ەنەم وتە ەركىن ادام، ءارى ەركە. اتام دا ەركەلەتىپ، بار ماحابباتىن بەرىپ وتىرادى. ولاردى تۋىستار قىز جىبەك پەن تولەگەن دەيدى. ال ماعان: “سەن مەنىڭ مامام سەكىلدى ىربىق بولماۋىڭ كەرەك، ماماما ۇقساپ بارا جاتىرسىڭ” دەپ ءجيى اشۋمەن ايتاتىن. ءاردايىم “مەن ەركەكپىن” دەپ كەۋدەسىن ۇراتىن. ءبىر كۇنى قاتتى سوققىدان ەسىمنەن تانىپ قالدىم. 1 اپتا اۋرۋحانادا جاتىپ، سوترەسەنيە الدىم. وندا دا اتام مەن ەنەمنىڭ ءسوزىن تىڭداپ كەتپەي قالعان ەدىم، تۋىس جەڭگەمىزدىڭ ۇيىنە قوناققا بارعاندا بارىنە كوزىم جەتتى. كوز الدىمدا جەڭگەسىمەن كەرىسىپ قالىپ، ۇرىپ، شاشىنان سۇيرەدى. جەڭگەمىز جىلاپ وتىرىپ، ستۋدەنت كەزىندە اپاسىن دا “جاتا بەرمەي تىرلىك ىستەسەڭشى” دەگەن سوزىنەن كەيىن باسىنان ۇرىپ تاستاعانىن ايتتى. سوندا دا سوعا بەرگەنگە ابدەن ەتىم ءولىپ قالعان ەكەن. كەتپەي جۇرگەنىمدە سالتاناتتىڭ وقيعاسىنان كەيىن ءبىر تۇندە زاتتارىمدى جيناپ، داعدارىس ورتالىعىنا كەلدىم،- دەيدى ق. ەسىمدى كەلىنشەك.
ەنەم ەكەۋى قوسىلىپ ۇراتىن
انالار ۇيىندە بالاممەن تۇرىپ جاتقانىما جارتى جىل بولدى. ءوزىمنىڭ اياعىم اۋىر. تۇرمىس قۇرعان سوڭ 2-3 اپتادان كەيىن قول كوتەرىپ باستادى. شىداپ، ۇندەمەي ءجۇردىم. بالام دا تولاسسىز تاياق جەۋلەردەن دۇنيەگە بۇيرەك جەتكىلىكسىزدىگىمەن كەلدى. سول دياگنوزدى ەستىگەننەن ساۋ بالا تۋىپ بەرۋگە قاۋقارىڭ جەتپەدى دەپ ۇرۋىن ۇدەتە ءتۇستى. ەنەم دە ايتاقتاپ، اۋرۋ بالاسىن قۇشاقتاپ وتىرا بەرەدى، ءۇي جىلان جالاعانداي تازا ەمەس دەپ ايتاقتاپ، ساباتقىزاتىن. كەيدە قوسىلىپ ۇراتىن. قالاي شىداعانىمدى بىلمەيمىن، ءقازىر ويلاپ وتىرسام، توزاقتا بولعانمەن بىردەي كۇي كەشكەن ەكەنمىن. ءقازىر ۋزيستتەر ىشتەگى بالانىڭ دەنساۋلىعى جاقسى ەكەنىن ايتۋدا. تاعى قالسام، ەكىنشى بالام دا اۋرۋ بولار ەدى. سالتاناتتىڭ وقيعاسى دا ومىرىمە ۇلگى بولدى. ونىڭ ميسسياسى قازاق ايەلدەرىن ولىمنەن ساقتاۋ بولعان سياقتى،-دەپ ءسوزىن تۇيىندەدى ا. ەسىمدى جاس انا.
اقگۇل ايداربەك قىزى
پىكىر قالدىرۋ