2025 جىلى "سىرداريا-فەرعانا ءدالىزى" ترانسۇلتتىق نوميناسياسىن يۋنەسكو-نىڭ بۇكىلالەمدىك مۇرا تىزىمىنە ەنگىزۋ قاراستىرىلادى. "دالالىق عيباداتتىق ارحيتەكتۋرا" اتالاتىن قازاقستاننىڭ ەجەلگى كەسەنەلەرى، مەشىتتەرى (دومباۋىل، الاشا حان، ايشا ءبيبى، ارىستان باب، بابادجا حاتۋن، ابات بايتاق كەسەنەلەرى جانە باسقالار) بويىنشا نوميناسيا قۇجاتتارىن ازىرلەۋ قاراستىرىلاتىن بولادى. بۇل تۋرالى پرەمەر-مينيستردىڭ ورىنباسارى تامارا دۇيسەنوۆا ايتتى. 

–ۇلتتىق تاريحىمىزدىڭ تۇپكىلىكتى نەگىزىن قۇرايتىن دەرەكتەر قورى بولىپ تابىلاتىن تاريحي-مادەني مۇرا وبەكتىلەرىن قورعاۋ ماقساتىندا ءبىرقاتار جۇمىستار اتقارىلۋدا. اتاپ ايتقاندا مەملەكەتتىك رەسپۋبليكالىق ماڭىزى بار تاريح جانە مادەنيەت ەسكەرتكىشتەرىنىڭ تىزىمىنە ەنگىزىلگەن ىسقاق باب، قاراشاش انا، يبراگيم اتا كەسەنەلەرىندە، قىزىر مۇناراسىندا 2023 جىلى ولاردىڭ ساقتالۋىن قامتاماسىز ەتۋ ماقساتىندا عىلىمي-رەستاۆراسيالار جۇرگىزىلدى. سونىمەن قاتار، مەملەكەت باسشىسىنىڭ تاپسىرماسىنا سايكەس قازاقستاننىڭ  تاريحي-مادەني مۇراسىنىڭ بىرەگەي وبەكتىلەرىن يۋنەسكو-نىڭ بۇكىلالەمدىك مۇرا تىزىمىنە ەنگىزۋ جۇمىستارى پىسىقتالۋدا، – دەيدى ول.

ايتا كەتسەك،  ۇلى جىبەك جولىنىڭ فەرعانا-سىرداريا ءدالىزى 16 ەسكەرتكىشتى قامتيدى. ولاردىڭ سەگىزى تۇركىستان وبلىسىنىڭ اۋماعىندا ورنالاسسا، قالعان سەگىزى قىزىلوردا وبلىسىندا ورنالاسقان. ياعني، ولارعا جانكەنت قالاشىعى، كەسكەن-كۇيىك، شىرىك-رابات، ءبابىش-مولا، جانقالا، سىعاناق، جەتىاسار ءوازيسى، بالاندى قونىسى. وڭتۇستىك وڭىردەگى جادىگەرلەر قاتارىنا جۋانتوبە، قاراسپان، سيداق، تۇركىستان، ساۋران، وتىرار ءوازيسى، كۇلتوبە، ءبورىجار بەيىتتەرى جاتادى.