تجم مالىمەتىنشە، 28 ناۋرىزدا كەشكە قاراي الماتىدا اۋا رايى كۇرت ناشارلاپ، ەكپىندى جەل 18-24 م/س دەيىنگى جىلدامدىققا دەيىن جەتىپ، نوسەر جاڭبىر جاۋعانىنا بايلانىستى قالانىڭ بارلىق تج قىزمەتى مەن كوممۋنالدىق كاسىپورىنى كۇشەيتىلگەن جۇمىس رەجيمىنە اۋىستىرىلعان.

38 جەكە ءۇيدىڭ اۋلالارى مەن ءتورت كوشەنىڭ جەكەلەگەن ۋچاسكەلەرىن سۋ باسقان. ازاماتتىق قورعاۋ قىزمەتتەرى مەن جەرگىلىكتى اتقارۋشى ورگاندار سۋ باسۋ سالدارىن ۋاقتىلى جويۋدا.

"قازىرگى ۋاقىتتا قالاداعى جاعداي تۇراقتى. تىرشىلىكتى قامتاماسىز ەتۋ وبەكتىلەرى شتاتتىق رەجيمدە جۇمىس ىستەيدى. زارداپ شەككەندەر جوق"، - دەلىنگەن حاباردا.

توتەنشە جاعدايلار دەپارتامەنتى كەشە، 28 ناۋرىزدا 112 جەلىسىنە تۇرعىنداردان اعاشتاردىڭ قۇلاعانى بويىنشا – (كولىكتەرگە 13 جاعداي، عيماراتتارعا – 2 جاعداي، گاز قۇبىرلارىنا – 3 جاعداي) قوڭىراۋ تۇسكەنىن حابارلادى. قوڭىراۋلارعا جەدەل جۋاپ بەرۋ ماقساتىندا قالالىق توتەنشە جاعدايلار بولىمىندە سەنىم تەلەفونى اشىلىپ، 112 وپەراتور قىزمەت كورسەتكەن.