سونىمەن قاتار، تايۆانداعى ءزىلزالادان كەيىن جاپونيادا زارداپ شەككەندەرگە قاتىستى اقپارات جوق.
ريا نوۆوستي حابارلاۋىنشا، حۋاليان قالاسىنداچجۋنشان جانە چۋنسين كوشەلەرىنىڭ قيىلىسىندا ءىشىنارا قيراپ، قيسايىپ قالعان عيماراتتا سەگىز ادام قالىپ كەتكەن. وقيعا ورنىنا قۇتقارۋشىلار مەن ءورت سوندىرۋشىلەر جەتتى. ءبىراق قۇتقارۋ جۇمىسى كەزىندە افتەرشوكتار قايتالانىپ جاتتى.
ايتا كەتەيىك، تايۆاندا بۇگىن بەيجىڭ ۋاقىتىمەن تاڭعى 07:58-دە 7،7 بالدىق ءزىلزالا بولدى. سودان كەيىن 6،6 بالدىق جەر سىلكىنىسى قايتالاندى. مەتەورولوگتار تايۆاننان شىعىسقا قاراي 5،4 بالدىق ءتورت ءزىلزالا بولعانىن حابارلادى.
ءزىلزالادان حۋاليان قالاسىندا عيماراتتار قيرادى. سونىمەن قاتار تايبەي اۋداندارىندا ەلەكتر جەلىسى ءۇزىلدى. تايبەي مەتروسىن تولىق توقتاتۋعا تۋرا كەلدى. ارالدىڭ شىعىسىندا كوشكىن ءجۇردى.
وعان قوسا جاپونيانىڭ وڭتۇستىك-باتىسىنداعى وكيناۆا پرەفەكتۋراسىنىڭ مياكودزيما جانە ياەياما اۋداندارىندا جانە وكيناۆا نەگىزگى ارالىندا سۋنامي بولۋى مۇمكىن ەكەنى تۋرالى ەسكەرتىلدى. سودان كەيىن بيىكتىگى 3 مەترلىك سۋنامي جاونيالىق وناگۋني ارالىنا جەتتى دەگەن اقپارات تارادى. كەيىنىرەك ول جاپونيانىڭ يسيگاكي ارالىنىڭ جاعالاۋىنا جەتكەن.
بۇعان دەيىن جاپونيالىق عالىم الماتىداعى كوكتوبە تەلەمۇناراسىنىڭ جەر سىلكىنىسىنە دايىن ەمەس ەكەنىن ايتقان ەدى.
"قازاقستاندا دوكتورلىق ديسسەرتاسيا قورعاعان جاپون عالىمى، وساكا ۋنيۆەرسيتەتىنىڭ پروفەسسورى الماتىدا جەر سىلكىنىسى بولاتىنىن جانە قالاداعى كوپتەگەن عيماراتتار سەيسميكالىق دۇمپۋلەردىڭ اسەرىنە دايىن ەمەستىگىن ايتتى. اسىرەسە، الماتىداعى ەسكى تەلەمۇنارانىنىڭ جاعدايىنا قاتتى الاڭدايتىنىن جەتكىزدى. جاپوندار الماتى مەن قازاقستاننىڭ وڭتۇستىگىنە بىزدەن كوبىرەك الاڭدايدى"، – دەيدى قازاقستان گەوتەحنيكالىق قاۋىمداستىعىنىڭ پرەزيدەنتى اسقار جۇسىپبەكوۆ.
پىكىر قالدىرۋ