ءماجىلىس دەپۋتاتى امانجول ءالتاي سۋ تاسقىنىنا بايلانىستى قاتەلىك جىبەرگەن شەنەۋنىكتەر جازالانۋ كەرەكتىگىن ايتتى. اسىرەسە، ءبىرىنشى ۆيسە-پرەمەر رومان سكلياردى اتادى.
«ەلدى دە، وزگەنى دە مەزى قىلعان رومان سكليار سەكىلدى باياعىدان كەلە جاتقانداردى ورنىنان الاستايتىن ۋاقىت كەلدى. جالپى، سۋ تاسقىنى كەزىندە اقيقاتتىڭ ءوزى بەتىن اشىپ بەرگەندەي، جەرگىلىكتى بيلىك وكىلدەرى مەن ۇكىمەتتىڭ اراسىندا بايلانىس جوق ەكەنىن بايقادىق. سونىمەن قاتار بىزدەگى مينيسترلىكتەردىڭ اراسىندا دا تىعىز ارىپتەستىك ورناماعان»، - دەيدى دەپۋتات.
سونداي-اق ول سۋ تاسقىنىنىڭ الدىن الۋ ءۇشىن توتەنشە جاعداي مينيسترلىگى، سۋ مينيسترلىگى، اۋىل شارۋاشىلىعى مينيسترلىگى سەكىلدى مەملەكەتتىك ورگاندار بىر-بىرىمەن كەلىسە وتىرىپ، كۇش بىرىكتىرىپ جۇمىس ىستەۋلەرى كەرەك ەكەنىن ايتادى.
«وكىنىشكە قاراي، بىزدە ونداي جۇيە قالىپتاسپاعان. كەڭەس ۇكىمەتى كەزىندەگىنىڭ ءبارىن جامانداي بەرمەۋىمىز كەرەك. ويتكەنى سول تۇستا اسىرەسە، گيدراتسيا سالاسىندا مىقتى ماماندار بولدى. ناقتى جۇيە بولدى. كوكتەمگى سۋ تاسقىنا ءبىر جىل بۇرىن كۇز ايىنان بەرى دايىندىق شارالارى جۇيەلى جۇرگىزىلدى. قازىرگى كەزدە ەشتەڭەگە جاۋاپ بەرگىمىز كەلمەيدى. قىس كەلىپ قاردىڭ استىندا قالساق تا، ەشكىم جاۋاپسىز. كوكتەم كەلىپ، سۋ اپاتى بولسا دا ەشكىم جاۋاپ بەرۋگە قۇلىقسىز. تابيعاتتىڭ توسىن جاعدايى دەپ قۇتىلىپ كەتەدى. بۇلاي اۋزىمىزدى قۇرعاق شوپپەن ءسۇرتىپ وتىرا بەرگەنىمىز جارامايدى»، - دەيدى امانجول ءالتاي.
پىكىر قالدىرۋ