ماجىلىسمەن بايلانىس قىزمەتى ءتاريفىنىڭ كۇننەن كۇنگە قىمباتتاۋى حالىقتىڭ قالتاسىن قاعىپ، تىنىسىن تارىلتىپ بارا جاتقانىن ايتتى.

“تاريفتەر جىل ساناپ ەمەس، اي ساناپ وسۋدە. ماسەلەن، باسەكەلەستىكتى قورعاۋ جانە دامىتۋ اگەنتتىگىنىڭ مالىمەتىنشە، ۇيالى بايلانىس قىزمەتتەرىنىڭ تاريفتىك جوسپارى 2023 جىلى 57%-كە دەيىن وسكەن. ال 2021-2022 جىلدارى تاريفتەردىڭ ءوسۋى ورتاشا العاندا 13-تەن 37% دەيىن بولعان. اتاپ ايتساق، 2023 جىلدىڭ ساۋىرىندە بيلاين «ياركيي» تاريفتىك جوسپارىن 1790 تەڭگەدەن 2490 تەڭگەگە دەيىن (ءوسىم – 39%) قىمباتتاتتى، كسەلل مەن تەلە2 تامىز ايىنان باستاپ ءارتۇرلى تاريفتىك جوسپارىنىڭ وسەتىنىن مالىمدەگەن. اتاپ ايتقاندا، «رەالنىي بەزليميت» (كسەلل) 3390 تەڭگەدەن 4390 تەڭگەگە (ءوسۋى 29 %)، «پروستو سۋپەر» (تەلە2) 2590 تەڭگەدەن 3290 تەڭگەگە (ءوسۋى 27 %) ءوستى”، – دەدى بەيسەنبايەۆ.

دەپۋتات اكتيۆ، كسەلل وپەراتورلارى تاريفكە 1 مىڭ تەڭگە، ال ارنايى الەۋمەتتىك جەلىلەردەگى ينتەرنەتتى ءليميتسىز قولدانۋ ءۇشىن ۇستىنەن تاعى 990 تەڭگە قوسىپ وتىرعانىن ايتتى. سوندا بار-جوعى 3390 تەڭگەلىك تاريف 5380 تەڭگەگە دەيىن، ياعني 59% قىمباتتاعان.

وعان قوسا دەپۋتات بايلانىستىڭ باعاسى قىمبات بولسا دا، ساپاسى سىن كوتەرمەيتىنىن اتاپ ءوتتى.

“بايلانىس وتە ءالسىز جانە ينتەرنەت جىلدامدىعى تىم باياۋ. Speedtest جاھاندىق رەيتينگى بويىنشا ءموبيلدى ينتەرنەت جىلدامدىعى بويىنشا قازاقستان 142 ەلدىڭ اراسىندا 67 ورىندا تۇر. سونىمەن قاتار، ەلىمىزدە ءالى دە ينتەرنەت جەتپەگەن اۋىلدار بار. ماسەلەن، 2023 جىلعى 1 قاڭتارداعى جاعداي بويىنشا، 6 290 اۋىل بولسا، سونىڭ شامامەن 1،5 مىڭ اۋىلىندا ءموبيلدى ينتەرنەت مۇلدەم جوق. ال 902 اۋىلدا تەك ءبىر عانا ءموبيلدى وپەراتور بار. دەمەك، تۇتىنۋشىدا ەشقانداي تاڭداۋ جوق. سودان كەيىن «قازانشىنىڭ ەركى بار، قايدان قۇلاق شىعارسا» دەگەندەي، وپەراتورلار ءوزى قالاعان باعانى قويماي ءقايتسىن”، – دەپ ناقتىلادى دەپۋتات.