ماحامبەت اۋدانىنداعى جايىق وزەنىنىڭ جاعاسىنا بوگەت تۇرعىزۋ ءۇشىن توپىراق قازۋ كەزىندە ادامنىڭ باس سۇيەگىنىڭ 12 فراگمەنتى جانە دەنە سۇيەكتەرىنىڭ 26 فراگمەنتى تابىلدى.
وقيعا ورنىنا كەلگەن قۇزىرەتتى ورگانداردىڭ قىزمەتكەرلەرى بۇل فاكتىنى اقپاراتتى ەسەپكە الۋ كىتابىنا تىركەپ، تەرگەۋگە دەيىنگى ارەكەتتەردى باستاپ كەتتى. الداعى ۋاقىتتا تابىلعان سۇيەكتەر قايتا جەرلەنەدى.
«ەسكى سارايشىق ءۇشىن ارحەولوگيالىق قازبا كەزىندە ادام سۇيەگىنىڭ تابىلۋى جاڭالىق ەمەس. ويتكەنى، ورتاعاسىرلىق سارايشىقتا ۇلكەن قورىم بار ەكەنى بارشامىزعا بەلگىلى. ارحەولوگيالىق زەرتتەۋ بارىسىندا دا، ءتىپتى ەسكى سارايشىق اۋىلى ىشىندە ءتۇرلى جۇمىستار بارىسىندا دا ادام سۇيەكتەرى ءجيى كەزدەسىپ جاتادى. ال، بۇگىنگىدەي، ەلدە سۋ تاسقىنىنان قورعاۋ ماقساتىندا جاسالىپ جاتقان ۇلكەن جۇمىستار كەزىندە ادام سۇيەكتەرىنىڭ شىعۋى زاڭدىلىق. ادەتتە، مۇنداي حابار جەتكەن بويدا ماماندار ءوز جۇمىستارىن اتقارىپ، ولاردى زەردەلەپ، جەر قوينىنا سالت –ءداستۇرىمىز بوينشا تاپسىرادى»، - دەدى «سارايشىق» مۋزەي-قورىعىنىڭ ديرەكتورى مۇحتار ابىلسەيىت.
ايتا كەتۋ كەرەك، بۇعان دەيىن اتىراۋ وبلىسىندا تابيعي سيپاتتاعى توتەنشە جاعداي جاريالانعان بولاتىن. قازىرگى تاڭدا جايىق بويىندا ورنالاسقان ماحامبەت، يندەر اۋداندارىندا جانە اتىراۋ قالاسىنا بوگەت تۇرعىزۋ جۇمىستارى قارقىندى ءجۇرىپ جاتىر.
پىكىر قالدىرۋ