نۇرلان بايبازاروۆ بانكتەر جەكە كاسىپكەرلەردىڭ نەسيەلەرى بويىنشا تولەمدەرىن كەيىنگە قالدىراتىنىن، ايىپپۇلدار مەن ءوسىمپۇلداردىڭ وسپەيتىنىن ايتتى.
پرەمەر-مينيستردىڭ ورىنباسارى نۇرلان بايبازاروۆ پەن باتىس قازاقستان وبلىسىنىڭ اكىمى ناريمان تورەعالييەۆ كاسىپكەرلەرمەن كەزدەستى، دەپ حابارلادى ۇكىمەتتىڭ باسپا ءسوز قىزمەتى.
بيزنەس وكىلدەرى كاسىپورىندارداعى قازىرگى احۋال جانە كەلتىرىلگەن شىعىندار تۋرالى ايتىپ، سۋ تاسقىنىنا قاتىستى وزدەرىن تولعاندىراتىن سۇراقتار قويدى.
ۆيسە-پرەمەر مەملەكەت بيزنەس-قوعامداستىققا قاجەتتى قولداۋ كورسەتەتىنىن اتاپ ءوتىپ، جەرگىلىكتى اتقارۋشى ورگاندارمەن بايلانىستا بولۋدى سۇرادى.
"كوپشىلىگىڭىزدىڭ وندىرىستىك پروسەستەر عانا ەمەس، شيكىزاتپەن قامتىلۋ، لوگيستيكا جانە وتكىزۋ ماسەلەلەرىنە اسەر ەتەتىن كۇردەلى جاعدايعا تاپ بولعاندارىڭىزدى ءتۇسىنىپ وتىرمىز. كەلتىرىلگەن شىعىن تۋرالى ءاربىر مالىمدەمە جەكە قارالادى. بۇل ءبىرىنشى كەزەكتە شاعىن جانە ورتا بيزنەسكە قاتىستى"، — دەدى نۇرلان بايبازاروۆ.
سونىمەن قاتار ول بانكتەر مەن ميكروقارجى ۇيىمدارى شوب سۋبەكتىلەرى مەن جەكە كاسىپكەرلەردىڭ نەسيەلەرى بويىنشا تولەمدەرىن كەيىنگە قالدىراتىنىن، ايىپپۇلدار مەن ءوسىمپۇلداردىڭ وسپەيتىنىن ايتتى.
ءوڭىر باسشىسى ناريمان تورەعالييەۆ جينالعاندارعا تۇسىنىستىك تانىتقانى ءۇشىن العىسىن ءبىلدىردى. شامامەن 50-گە جۋىق كاسىپورىن سۋ تاسقىنىمەن كۇرەس كەزىندە كومەك كورسەتىپ جاتىر.
بيزنەس وكىلدەرى سۋ تاسقىنىمەن كۇرەس، ونىڭ ەكىنشى تولقىنى جانە قالپىنا كەلتىرۋ جۇمىستارى كەزىندە كومەك كورسەتۋدى جالعاستىرۋعا دايىن ەكەنىن ايتتى. قاجەت كەزدە قوسىمشا رەسۋرستار، تەحنيكا بەرىپ، سونداي-اق ارنايى قورلارعا قاراجات اۋدارادى.
پىكىر قالدىرۋ